Oté

« Balyé nèv, balyé prope ! »

In kozman pou la route

Justin / 18 zwin 2021

JPEG - 43.6 ko

Médame, méssyé, La sosyété koze èk mwin sé koze èk in kouyon mé sé o pyé d’lo mir k’i oi lo masson.

Mézami mi koné pa si dan zote lantouraz i pratik kozman-la, pars, sanm pou mwin li lé moinss koni ké bonpé d’ote. Poitan, sa i vé pa dir li lé pa intéréssan, par son sanss prope épi par son sanss figuiré.

Sanss prope, la pa bézoin kass kate pate in kanar pou konprann kossa li vé dir : in balyé nèv, wi oi li néna toute kalité kan wi sorte ashté ali, mé sans figuiré sa i rapèl amwin in kozman néna dann la lang franssé é i di konmsa : « Tou bo, tou nouvo » é mwin lé sir zot konm mwin nou la fine tonb dann pyèz la nouvoté é pa arienk in foi. Kékshoz nouvo, ni done ali toute kalité mé o firamézir lo tan i pass lintéré wi porte ali i diminyé ziska disparète.

La pa bézoin mi di azot, mé zot i konpran lintéré toulmoun néna pou kékshoz nèv é koman firamézir, avèk lo tan, li komanss fatig aou...

Alé ! Mi kite azot rofléshi la dsi é ni artrouv pli d’van. Sipétadyé.