Dir néna 110000 zilétré sé pa insilt La Rényon, sé dire lo zoutiy « édikassion nassyonal »lé pa vréman éfikass

Mézami, néna pwin lontan la fé in gran ralé-poussé dann Témoignages pars in dalon-an parlan d’covide – la ékri néna bonpé zilétré dann bande téritoir loutre-mèr é lé pli fassil fé pran in lilétré in véssi pou in lantèrne ké pou demoune instruiyé. In bonpé la majine bande téritoir loutremèr lété insulté. Kan i di sa pars néna trépé zilétré dann bande péi l’outremèr.

Alon parl pou noute péi La Rényon : promyé késtyon ni pé poze anou sé dsi lo nonb zilétré. Si ni suiv bande shif ofisyèl néna par-la 110 000 pèrsone an az konète lir épi ékrir dann la lang bande fransé lé konsidéré konm ilétré. Lé vré, lé pa vré ? A tou lé kou si bande zankète lé fé konm i doizète fé i fo ni panss lé vré.

Dézyèm késtyon : si wi koné lire épi ékrire dann la lang bande franssé sa i vé dir, dsi in késtyon pointi, lé pli fassil roul aou dann la farine, fé prande aou blan pou noir, makaroni pou la bouji ; Sa lé bien diffisil pou dir sirtou dann in domène pointu konm la kriz covid. Dann in ka konmsa solon mwin in bon sondaz d’opinion i doizète fé. Pars sansa i koné pakèl piblik i pé zète plis manipilé é par ki. Sansa ni pé koze la dsi ziska la fin di monde.

Aprésa i fo ni poze anou in késtyon é sé sète-la : demoune la pa fé sansa la pankor fé vaksine azot sé pars zot lé konte lo vakssin, sansa pou in n’ote rézon. I pé domandé galman si demoune la vaksiné sé pars zot lé pour sansa pou in n’ote rézon. Mwin pèrsonèlman mwin lé in pé dann lopassité pou konprande lo gran sobatkoz mwin la suiv dann noute zoinal.

Astèr mwin lé a d’mandé kan i di issi néna 110000 zilétré lo pèp rényoné i doi santir ali insulté oui sansa non. Si lo shif lé vré ! Mi panss sinploman sé lo zoutiye lédikassion nasyonal lé pa éfikass konm li téi doizète dann in réalité konm la n’ote… Astèr mwin la fine di, pou mwin, lo pèp rényoné lé bonpé kiltivé é la kiltir pou li lé inportan : son kiltir rényonèz an promyé. Pa tienbo konte nout kiltir lé vré sa i vé dir i insilt anou. Donk mi san amwin insilté ! Lédikassion nassyonal, mi pans pa mwin la isnsilt aèl kan mi di èl la pa in bon zoutiy.