Oté

In domi-vérité sé in domi-mansonz tanka la vérité san pour sans sé sa k’i fo

Justin / 15 zwin 2021

Mézami, yèr nou té apré anparl la kanpagn bande kandida zéléksyon réjyonal, é mwin téi di souvan défoi déssèrtin i kontante azot avèk in dommi-vérité, plito k’alé zisko boute zot panssé. Konm zot i sava pa oboute zot panssé mi domande amwin la plipar d’tan pou kossa i kontante d’in larguimantassion an domi-tinte.

JPEG - 43.6 ko

Dèrnyé foi, mwin la pran lébzanp la route an mèr é mwin la di, si ni panss sa va fini an katédral kassé, i fo di kanstréti pou k’i roprosh paou d’konète dé shoz épi d’kash la vérité. La vérité dann la shoz publik mi panss sa lé vréman nésséssèr, itil, é sansa la politik i amène pa bien loin.

Mé dann lo domène kiltirèl, sanm pou mwin, plizyèr kandida la pa ézite dévoil lo fon zot panssé kan zot la anparl la lang kréol rényonèze. Zot i koné fitintan in bonpé té i ézite dire zot lé paré pou done nout lang matèrnèl la plass i mérite ali pou vréman. Pou pa fé pèr d’moune ? Pars bande réak té riskab i transform sa an arm konte lo progré noute pèp rényoné.

Mé zordi, nou va dir plizyèr kandida i ézite pi pou dire zot i vé in plass ékilibré pou la langue kréol rényoné, dann lékol, dann la kiltire, dann lo révèye noute lidantité... Lé vré ké lopinyon la shanj an vitèss. Antouléka sé sak in sondaze i di é l’moune i ézite pi domande bande politik a fé zot méyèr possib dann lintéré noute lang kréol rényoné – dèrnyé sondaz la fé néna in moi é li amontre vréman lopinion la shanjé.

Si bande kandida i sava dann sanss-la, la pa forséman pars zot i vé suiv lopinion, mé sanm pou mwin pars zot ossi zot la fine shanj in bonpé. Finalman, sa sé in n’afère normal, vi ké bande parti, bande kandida, bande list zot ossi zot i fé parti lopinion piblik é zot i bouj dann minm sans ké lopinion.