Lakey lo sit > Chroniques > Oté

In kozman d’sazèss, in voi intélizante, dann milyé la kouyoniss anbyanssé !

lindi 16 out 2021, sanm Justin

Mi panss in zour kan sar fine trouv lo sogré la koviddiznèf soré bon fé in léspozission gratuite pou pass partou é pou ropran toute la kouyonade la di dsi maladi-la-la kouyonade anbyannssé ! La kouyonade épi lo sogré pou vréman... La kouyonade ? Kissa la di sa ? Aou, amwin, anou bande ti-kolon la sossyété mé galman bande médssin, bande politik, bande kalifyé d’syantifik, akoz pa bande sèrviss sogré, akoze pa bande kouyon patanté téi panss zot l’avé la konéssanss toute sak l’apré éspassé.

Zour-la, mi panss, la vérité va tienbo dann in sèl paz kayé é la kouyoniss nora bézwin kék milyon d’paz pou anpar ali…

Mézami néna in provèrb bande zantiyé i di konmsa : « Bondyé la fé lo piss pou morde anou é pou grate anou, mé li la done anou lo zong pou tyé bébète-la ». Sa i vé dire la maladi avèk son médikaman lé dann la natir é souvan dé foi pa tro loin par rapor landroi l’apré rodé.

Mézami rapèl anou bien méssyé Louis Pasteur in médssin l’avé in grande intélizanss épi in gran sanss lobsèrvassion, épi ni pé dir li téi aplike in bon métode, lo métode syantifike-na poin méyèrre ké sa !- é kan la momon lo marmaye in shien anrazé l’avé morde ali, la domande lo doktère pou guéri son garsson, li la konprande la solission lété dann lo kor lo marmaye li-mèm si té i pé mète an lite son bande lantikor. Sé sak li la fé, é l’apèl sa lo vakssin : in romède la guéri lo marmaye kaziman kondané a mor... lo piss épi lo zong.

Mi di azot in sinpe kozman é mi invite azot prande ali pou sak li vo. Sé listoir in pèrsone azé dann in lopital la Martinik. Li la trape lo salté d’maladi é kan la domande ali si li la vaksiné li la réponde non, mé li la di li la boir lo thé-la tizane si zot i vé, sak li la trouv dann lo gayar natir son péi… Lé sir li la pa prande lo thé k’i falé, lo tizane k’i falé, pou bate atèr so vilin maladi mé son shomin lété sanm pou mwin pa si mové ké sa. Finalman li té pa pli linbéssil, ké toute bande tète do zèf i blablate dann télé dopi dé moi, talèr dé z’ané.

In voi d’sazèss, in voi intélizante an parmi in loséan la kouyoniss anbyanssé.

NB-Késtyon-réponns : kèl sé lo shédèv la kouyoniss nou la antande sé tan issi ? A kou sir, sé sète in pé i répète dopi dé moi é dé moi, é k’i di konmssa : zote i panss l’apré vakssine azot alé oir l’apré mète in puss dann zote kor pou mète azot sou la dépandanss bande grande puissanss. Mi panss sé sa k’i fo marke dsi lo frontispiss in gran moniman pou la gloire la kouyoniss inivèrssèl.


Inn modékri, inn ti lavi, inn komantèr ?

lé modèré-dovan

Forom kozman lé modéré-dovan : lé néséser inn komander la finn konfirm ali pour out kontribusyon i aparé an liyn.

Kisa ou lé ? (réponn lé pa obligatwar)
Votre message

(Pou kré bann paragraf, lès sinpman trwakat liyn vid.)


Facebook Twitter Linkedin Google plus