Oté

« In Manzé koshon »

In kozman pou la route

Justin / 5 zwin 2021

JPEG - 43.6 ko

Médam zé Méssyé, la sosyété, koze èk mwin sé koze èk in kouyon, mé sé o pyé d’lo mir k’i oi lo vré masson. Mézami mi panss zot i koné koman i lé manzé koshon ? Toute zafèr lé mélanjé dodan : rèss manzé li, tourto li, patate li, grin maskade li, anfin in pé toute sorte dé shoz. Si néna la po zak i mète ankor d’dan san konté toute kalité eavaz néna dan la bitasyon. Sanss prop sé sa, mé konm mi di azot marmaye dann tan téi triye in pé sak lé bon pou manzé. Delo i vien dann mon boush kan mi arkalkil sa...

A park sa, sa sanss prope,mé sanss figuiré alor ? Ni pé di sé in lalyanss konte natir-in lalyanss demoun normalman na poin arien pou fère ansanm é oila ké zot lé ansanm. Sa lé vré-sansa demoun i kroi- dann la politik lé konmsa, mé sak lé sir sé ké kozman-la, i ansèrv bonpé kan lo tan la politik i ariv. I paré mèm ,dann déssèrtin ka, lé si tèlman mélanzé k’in poul lé riskabe pa rokonète son pti. Anfin, sé la vi lé konmsa koméla.Alé ! Mi kite azot rofléshi la dsi é ni artrouv pli d’van. Sipétadyé.