Kriké ! Kraké ! Zistoir tang épi torti.- morso niméro 1

Mé zami, zordi mi sava rakont azot in pti zistoir. Antansyon la pa inn ti gigine listoir mé in listoir kourt. Mé avan mi komans mi konsèye azot zot granpèr, zot granmèr, zot papa, zot momon mi lans azot in l’invitasyon : rakont zistoir zot zanfan sansa zot ti zanfan pars marmaye i yèm sa épi konète zistoir sé konète la kilkir in péi, in pèp. Rakont zistoir la pa, pad itou, in tan pèrdi.alé ! Ni anvoye.
L’avé inn foi pou inn bone foi, mésyé lo foi la manz son foi avèk dé grinnsèl.

Tang avèk torti l’apré baladé dann kabos épi bafon. Inn konm l’ot l’apré rode kékshoz pou done la boush pou mashé. Tang i rode plito limas, vèr d’tèr, frui, rasine é torti li piosh isi é la inn dé légime, inn dé frui-mi pans pa li manz zinsèk é tout sort shoz konmsa. Zanimo, zot i koné sa lé konm de moun ; sa i yèm bien marsh – marshé pou fé pass in pé lo tan, épi pou antann in pé nouvèl, la di la fé é konpagni.
Ala lé dé konpèr lé dann in shomin la tèr in pé larz. Zot i marsh, marsh é toudinkou in kamiyonète i ariv a pasé. Tang i di avèk torti : Otoué alon sort dovan ! Loto va kraz anou, mél o tan lo torti i konpran sak l’arivé katsankat lé dsi zot. Tang i évite loto-la, dèrnyé minit, mé torti arien a fèr. La rou i pass dsi li, i fé vol ali l’ot koté tèrlaba. Konm son tète lété bien dan son kokiy, sa i soul ali in pé mé i tyé pa. Li lé kon tan é son kamarad tang lé kontan galman. Mèm lo shofèr kmyonète l’apré jiré, zot i s’anfoutsa. Zot i kontinyé zot shomin.
Kriké ! Kraké ! Kriké mésyé ! Kraké Madam !

Astèr tang i domann Torti pou kosa loto la pa tyé ali. Torti i réponn li lébien kosto sé pou sa li la pa gingn lo shok pou vréman. Mé Tang la tète i travaye : li di dann son kèr, loto-la lé gro mé finalman sé inn moukate. Akoz li la pa gingn kraz torti ? Astèr li di torti li paryé li pèrs la rou loto arienk avèk son zépine. Torti i kroi pa, mé kan ou néna in kamarad i vé fé la kouyonad, ou i shok pa li.donk torti i di sinploman : « Tang, loto-la sa lé lour é i pé kraz aou pars ou na poin la kok konm moin »
I sifi torti i di son dé kozman son kamarad pou sète-la éte pli bandé ké bandé éli komans rode dézord. Li di : « Torti, ou i kroi ou lé méyèr k’moin ou la ? Ou a oir sito k’in loto i pass, li va konète amoin ! ». Torti dann son kèr i di : « Porvik néna poinn loto pou pasé zordi, sansa mi pèrsd mon kamarad. »

A suiv-Mon zistoir la pankor fini - ni rotrouv mèrkrédi pou morso niméro 2