Oté

Lé pli fassil suiv lo fil dolo, ké romonte lo kouran

Justin / 26 avril 2021

JPEG - 43.6 ko

Mézami biensir zote va dir amwin dir in n’afèr konmsa sé konm invante lo tiède. Mi koné mé, konm in bonpé d’moun mi kalkil défoi si i fo alé dann sans dolo i koul sansa armonte lo kouran. Zote i koné demoun la plipar d’tan lé oportiniste, zot i profère alé dann sans kouran : ni pé dir konmsa mèm l’ariv band traïzon dann listoir.

Sé konmsa ké Figaro la dénonss la révolt Sin-Lé. Sé konmsa ankor kan i shanj prézidan dan La franss néna in pé i ralyé lo prézidan. Mé poukoué oziss ? Pé s’fèr la bézoin in plass zélu, antouléka sé pars néna kékshoz pou gagné.

Mé la pa touzour pou sa. Tazantan sé pars tienbo in pozissyon avèk la préssyon k’i sava ansanm lé diffisil é pou déssèrtin moun i vo myé sèdè dsi la késtyonn prinsipal an éspèran gingn la trankilité an rotour, sansa gingn moinss lo kou avèk lo pouvoir kolonyal…

Mé antansyon, kan wi sava dann sans lo kouran, momandoné wi pé kalbite o-t’an-ba dann in kaskade é sak wi oi konm in bon solissyon zordi sa s’pé sé in mové solissyon dann l’avnir. Mèm in katastrof anonssé.
Donk si mi arvien dsi mon kozman é si mi porte bien antansyon sak i éspass dann laktyalité, mi panss néna dé foi, lé pli proférab romonte lo kouran. Zot i koné san tardé nora zéléksyon rézyonal é konm toute demoun mi ékoute-ékoute in pé, mi sèye konprann lo program lé z’inn épi lé z’ot.

Kan mi fé sa, mwin néna mon fasson dékode lo band méssaz, mi diré mwin néna mon griye léktir. La pa in sogré é sak i lir mo n band modékri, i koné la manyèr mi dékode band program. Kèl manyèr ? Sinploman dann sanss mon parti la aprann amwin alé é pa dann sans kontrère.
Kossa, zot i i dann mon zorèye, mi parl an parabol ; mwin sré in parabolèr ? Mi panss pa mé nou néna lo tan dovan nou pou kontinyé aspliké. A pli d’van mézami.