Oté

Lé tar, lé bien tar, mé lé pa tro tar pou lo pèp rényoné révéyé

Justin / 11 zwin 2021

JPEG - 43.6 ko

Mézami, yèr mwin t’apré kalkilé dsi kossa mi sava ékri pou zordi. Kékshoz bien ? Kékshoz gayar ? Kékshoz i mète la joi dann kèr ? Kékshoz kool ? Kékshoz i rassur in pë, é i inkyète pa tro ? Mé, fransh vérité, lé pa fassil pou trouv in kékshoz konmsa zordi… Dabor issi la Rényon néna troi zédipémi-pandémi : la bronkyolite bann ti marmaye, lo Kovide avèk son varyan, épi la deng san konté toute bande tablatir l’apré akabe anou.

Avèk sa noute kontan traka lé déza bien sharjé… Si ni arzoute lo réshofman klimatik, la fèrmtir possib pa mal réstoran, la kours an avan lo shomaz, ala nou lé dann traka ankor pliss. An plisské sa, mi san konm in gran l’anvi dan la tète noute bande konpatriyote pou amenn in kou d’ fète dan la vi an mode débridé, mi san galman konm in linsoussyans shé mon bande konpatriyote pou lèss de koté toute bande késtyon k’i fash é konm i di amenn la vi konm I ariv.

Oui, konm i arive. Konm Fourcade, in gran shansonyé rényoné téi di :

« Provi mi yème, provik mi viv, mi pran la vi konm li ariv, lo zour la nuite lé touzour parèye, mon kèr lé konm in kèr d’solèye. »

Mi san shé mon bande konpatriyote lanvi d’in zénéral pa la èk sa... é oila pa ké mi lir dann noute zoinal-dsou lo shapo « Di sak na pou di » – in kozman in moune lé abityé ékri dann zoinal in kronik dsi déssèrtin moune li koné vik li lé doktèr é kan mi lire son modékri, é kan mi ariv o boute mi rèss konm in vyé kréol téi di dann lindivi : i fo kroir lo komansman, i fo kroir la fin dann sak li ékri, sansa inn é l’ot, i fo pran sa o sèryé, sansa konm domi-sèryé domi-plézantri ?

I fo ni kroi bande jenn rényoné lé kondané par la sosyété é par zot mèm, é par lo mank lakonpagnman par zot paran, a rotrouv azot a la fin d’in gran parkour in linsèrssyon o rabé dann la sosyété ? Dann mon kèr mi di sa lé tro triste. I pé pa spass konmsa. Pars sanm pou moin sar in défète nout pèp rényoné, é la viktoire la sossyété post-kolonyal étoute son l’atiraye dë ranplassman.