Oté

« Lo dan lé bète »

In kozman pou la route

Justin / 7 zwin 2021

JPEG - 43.6 ko

Médame, Méssyé, La sosyété koze èk mwin sé koze èk in kouyon, mé sé o pyé d’lo mir k’ oi lo masson. Mézami, pti provèrb-la mi panss zot i koné sa pars demoun téi ansèrv de sa kan mwin lété jenn marmaye é koméla i di touzour kozman-la. A moinss k’i di : « La boush lé bète ! é sa i vé dir lo mèm zafèr. Kossa sa i vé dir parlfète ? Sinploman ké la pèrsone i ri fasilman é pou n’inporte ékèl rézon. Mé si ni kalkil bien, i fo oir si la pèrsone i di sa, sé konmsi èl té apré éskiz aèl avèk in moun èl i panss lé froissé par son kozman, sansa par son réaksyon. Romark bien lo méyèr fasson sé tourn son lang sète foi dann son boush, konmsa wi évite froisse demoun. Mé mi pé assir azot sa lé diffissil, pars le moun la plipar d’tan lé sisèptib konm lo zèrbe i apèl tron-la-mor é i ramass son pti fèye kanwi poite out doi dann son diréksyon, prèss san toush ali, alor wi pé pran oute prékossion mé la pa zordi domin, la pa koméla talèr wi pé froiss azot mèm san k’ou néna lo lintanssyon. lo myé sré d’dir : « si ou lé pa kontan wi pran konstan ! » mé mi koné pa si sa lé indiqué dann toute sityasion. Alé ! mi kite azot rofléshi la dsi é ni artrouv pli d’van. Sipétadyé.