Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Lo tan militan va rotourné : sa lé forssé an déor lo monde ofisyèl

mardi 18 mé 2021, sanm Justin

Mézami, souvan défoi mi kalkil lo tan mwin konm d’ote nou la fé l’érèr abandone lo térin pou romète sa dann la min bande zofisyèl. Sa lé vré dann tan Mitterrand la gingn zéléksyon kont Ziskar. Sa lé vré plizyèr foi dann mon vi : konbien foi mwin l’arète fé parète in rovi, in zoinal. Konbien foi mwin l’arète alé bande rényon pars sanm pou mwin l’avé d’ote pou ranplass amwin, é mwin téi oi pi tro mon litilité dann kissoi sète mon parti, kissoi sète lo sindika, kissoi in lorgnizassion pou band jenn.

Koman in n’afèr konmsa téi ariv ? Sinploman wi pé apèl sa la fatig, wi pé dire ossi sa la pi néssésèr pars gouvèrnman téi sar pran lo rolé. Mèm in tan mwin l’arète alé zarssiv pou rode la vérité dsi nout listoir, dsi noute vi politik, pars pou mwin lété lo role band zofisyèl pou fé sa. L’avé d’moun péyé pou sa, alor akoz kontinyé fé sa pou arien.

Poitan, zordi ankor mi panss si in militan li romète dann bra ofisyèl lo soin fé avanss lé shoz san li, lé karéman fouti. Pou koué ? Aou militan ou néna lo kèr, ou néna la passion, ou néna lo konviksyon, l’ofisyèl la poin tousala, li néna larzan, in règloman d’travaye, in l’èr pou sorti, in l’èr pou rantré é an pliss li lé péyé pou sa é sa sé lo pire dé shoz i pé arivé pou in militan.

Pran in bon ségrétèr d’séksyon avèk toute kalité zafèr li fé an prénan dsi son tan. Transform ali an konséyé minissipal, général, mèm réjyonal, sé done ali in kantité travaye pou li fé an pliss é li panss sa lé pli valabe ké sak li téi fé avan. Dann nout parti néna in léspréssyon pou sa : i di la pèrsone lé koupé avèk la baz. Pa par anvi, pa par nésséssité, mé pars li gingn pi fé la par dé shoz rante son militatism é pi bande tash administrativ. Pli valab e solon li !

Lo problème lé dann la solissyon, é la solission lé dann lo problème, donk lé forssé ké lo tan militan i arvien-in garanti pou fé avanss lé shoze an déor d’lo mond ofisyèl.


Inn modékri, inn ti lavi, inn komantèr ?

signaler contenu


Facebook Twitter Linkedin Google plus