Oté

Ptizan, Grandyab é lo panyé mazik - troizyème morso

In zistoir pou rakonte dsi galé

Justin / 20 zwiyé 2021

JPEG - 43.6 ko

Konm mwin la di azot yèr, kan Grandyab la déklar Ptizan landomin téi sava manze ali, toutsuite Lo pti marmaye la trouv la parade épi la di li néna in sogré. Son sogré : in panyé mazik. E toute la nuite lo Ptizan la kalkil kossa li téi sava fé pou sov son po é si possib fé pèye lo vilin dyab son méshansté. Sak va manze Ptizan la pa ankor né.

Kriké ! Kraké ! La klé dann mon posh ! La taye dan oute sak !

Kan Grandyab l’arivé landomin matin, li la parti oir Ptizan épi li la di : « Kossa k’i lé ankor so farss dé panyé mazik-la ? ». Lo marmaye la fé pou réponss : « Grandyab mi assir aou sa la pa in farss ditou, mé la vérité vré é mi pé dire aou in bon douzène pèrsone avan mwin la konète sogré-la. An atandan alé aou, pou rode toute sak i fo pou fé in panyé normal. Pou lo mazik sé mwin ké va mète anndan ».

Grandyab la parti rodé é li la mète lo tan, mé li la nyabou trouv tout lo bande zingrindyan téi falé.

Kriké ! Kraké ! Koton mayi i koul ! Rosh i flote !

Grandyab la aksèpe fé sorte lo marmaye dann son kaj é oila ké Ptizan an in néstan la nyabou fabrik in zoli panyé an liane shèvrofèye, bien tourné, bien kosto, é bien pratik o boudikonte. Kan li té fini li la di avèk l’ote : « Rante dann panyé-la é mi garanti sa i transporte aou an-o, dann syèl, ziska gro niyaz maron wi pé oir par dsi noute tète... ». Lo bébète téi vé par rante dann panyé mé Ptizan la antropri ali é la di : « Bravo lo dyab ! Sé sa toute oute kouraz ! sé konmsa wi prétan komande demoune issi an ba. Oute plass mwin noré onte mwin ».

Troizyèm morsso la fini-proshène foi katriyème morsso.