Oté

Ptizan, Grandyab, lo panyé mazik-Promyé morso

Zistoir pou rakonte dsi galé

Justin / 17 zwiyé 2021

Konm zot i koné déza, Grandyab la fèrm Ptizan dann in kaj épi li lé bien déssidé pou manz lo pti marmaye. Mé lo marmaye i fé konprande ali i manz pa la vyande konmsa : i fo in vyande promyé kalité avèk in bon pirj a la klé. Grandyab lé dakor.

JPEG - 43.6 ko

Kriké ! kraké ! La klé dan mon posh, la taye dann oute sak !

Donk lo grandyab i désside angrèss son pti viktime avèk in gamok manzé lo matin é pi in gamok manzé lo soir. Apré shak ropa li tate-tate lo marmaye épi li di :

« Lé gra ! Lé fine gra ! La pankor gra ! Lé gra ! la fine gra ! la pankor gra ! »

Afors manzé Ptizan i fini par vnir gra é li san lo zour i vien lo Grandyab i sava tyé ali, fé kui ali, é fé manz ali par son famiye lo dyab. Mé avèk Ptizan lé marké grandyab i sava gingn problème. Sé konmsa k’in zour Lo pti marmaye la arète manzé sansa dé-troi pti boushé pou ète an vi. Mé lo dyab i konpran o boute plizyèr zour son viktime l’apré mégri é li lé plizanpli an kolère mé li pé pa rande ali konte réèlman sak i éspass pars Ptizan i manze inn-dé boushé épi i jète lo manjé dann trou kabiné lo dyab l’avé mète son dispozission.

Si tèlman kan li tate-tate lo marmaye sé plito avèk la kolère é galman la kolère kan li di :

« Lé gra ! La fine gra ! la pankor gra ! lé gra ! la fine gra ! La pankor gra ! »lété kaziman avèk la raz.

In soir Grandyab l’arivé, li té an kolère pou vréman é li la di avèk lo pti marmaye : « Domin, ké wi vé, ké wi vé pa, mi manze aou tèlke. »

Mé Ptizan la fé pou réponss : « Grandyab, wi pé manze amwin si wi vé é tèlke, mé mi assura ou lé pa possib é la pa movèze volonté mé lé konmsa é pa otroman. »

– Possib, pa possib, sé mwin k’i déside é pa ou !!

Ptizan la fé pou réponss : « Grandyab, si mi di aou ssa, sé pa par movèze volonté mé mwin néna in sogré é lo dèrnyé k’i oi amwin vivan i fo mi di ali mon sogré ! »

– Sansa kossa v’arivé, lo dyab i di méshaman ?

– Kossa v’arivé, kossa v’arivé ? Sètan d’malère ? Wi koné kossa sa i lé ? Sètan d’tablatir, wi koné kossa i lé sa ? Talère sète foi sètan é mi pé dir aou sé pou ou, oute madame, oute famlmiye é lo famiye d’oute famiy.. Si wi vé pa ropran mon sogré.

Dézyème morsso lé fini-troizyème morsso i vien.