« Ravaz gèp si ou i vé, mé prépar aou pou détalé » 

Mésyé, Médam, La Sosyété koz èk moin sé koz èk in kouyon, mé sé o pyé d’lo mir k’i oi lo mason. Mi koné pa zot, mé moin néna kék souvnir kuizan par raport lo gèp. Etan pti, moin la gingn kék pikir, mé na poin tro lontan ankor moin la gouté. Pars gèp i kashyète bien son ni é si ou i sava ravaz ali, volontèrman sansa involontèrman, li donn aou pou ko nprann. Sé konmsa bèstyol la i oi l shoz. Mon papa la rakont amoin in zistoir-ala li la : son kouzin Roger té apré shaboul gèp kou d’ti galé-in pé té moiyin - Gèp i yèm pa sa é momandoné zot la désid ataké. Ataké ? Oui, mé pa lo résponsab mé mon papa té dobout déyèr. La rant dann son pti kilote é la donn ali pou la valèr. Zour-la, li la di, li la konpri kosa i apèl l’inzistis. Pétète zot osi zot néna in souvnir kuizan konmsa avèk gèp sansa in n’ot afèr mi pans zot la fine konprann dan la vi la pa toultan lo vré résponsab i pèye lo po kasé. Alé ! Mi kite azot rofléshi la dsi é ni artrouv pli d’van. Sipétadyé.