« Solèye i gnor pa in vilaz pou la pène li lé pti »

Mésyé, Médam, La sosyété, koz èk moin sé koz èk in kouyon mé sé o pyé d’ lo mir k’i oi lo mason. Ala in kozman pou fé plézir dann in mond lo gro i manz lo pti é linzistis lé pli répandi ké l’égalité. Astèr pou kosa in kozman konma lé ankourazan ? Pars si ou i di, shakinn dsi la tèr néna son plas dann solèye, sa i vé dir la natir lé konm li lé, mé préférabloman, la natir i okip anou an bien. Alé rode in vilaz pti konm ou i vé, konm in poin dsi la kart, ébin la natir lé rogardan vizavi d’li é èl i donn shakinn in par son zénérozité. Astèr ou i pans la zistis èk légalité lé bien réparti dsi la tèr é lo mond noré pa été konm li lé zordi si léta d’natir l’avé été réspékté.A ! Lo léta d’natir ? Ala kékshoz lé intérésan pou vréman si ou i port atansyon dsi oi. Alé ! mi kite azot rofléshi la dsi é ni artrouv pli d’van. Sipétadyé.