Oté

« Tizan, Grandyab : lo panyé mazik » - Dézyèm morso

Zistoir pou rakonte dsi galé

Justin / 19 zwiyé 2021

JPEG - 43.6 ko

Kriké ! Kraké ! La klé dan mon posh, la taye dann oute sak.

Médame, zé Méssyé, la sosyété, bonpé d’moune i koné zistoir Pti-Zan é pou mon par mi rapèl bien lo tan gramoune téi rakonte sa – dann tan l’avé poin la télé-pou amenn anou, ti dousman-ti dousman dann bra madame somèye. Donk mi sava rakonte azot zistoir-la, pou domande azot rakonte sa zot zanfan, sansa zot ti zanfan konmsa i obliye pa zistoir noute péi.

Figuir azot in zour Grandyab la soukTtizan avèk lintanssyon manze ali é oila ké li la mète lo pti marmaye dann in kaj épi i la di méshaman :

« Domin gran matin mi vien trape aou, pou manze aou an konpagni mon famiy lo dyab mwin la invite pou in bon ropa. ». Pti zan léspri lé vif é toutsuite pou toutsuite li di avèk lo dyab :

Konpèr Dyab, wi koné pa avan manz in vivan i fo wi angrèss ali bien, épi wi pirj ali pou in méyèr vyande, mé sirtou i fo wi angrèss ali bien. Si wi angrèss pa li, kossa oute famiye va panss de ou ? El va panss wi koné pa lé bone zabitide.

Grandyab la di : « kossa i lé so bone zabtide la ? É oussa wi tire in n’afèr konmsa ? Tizan i pèrde pa la karte épi li fé pou réponss : Oussa mi tire sa ? Fransh vérité, sé lo promyèr foi mi antan in kozman san zonèkté konmsa ! Méssyé Grandyab, oute mazèsté, do tou tan mi koné sa é mon kaz la jamé manj in zanimo san angrèss ali é san pirj ali. Ninporte ki i koné in kékshoz konmsa é sa i étone amwin bien antande in Dyab apré koze konmsa. – é mwin k’i kroiyé ou lété in déssandan d’roi, konéssan toute bande règ lonèkté. Mwin lé déssu, déssu, déssu. Mi koze pi avèk ou, avèk in malédiké konmsa. Sorte dovan mwin !

Grandyab la kalkil in kou. Dann son tète li panss lo marmaye néna sirman rézon é son prope famiye lé riskab pa ète kontan avèk li pou manze in vyande dézyèm katégori, pétèt minm tropizyèm é li la di :

« Tizan ou va rèss dann kaj-la ziska ké ou sar bien pirjé é ké oute vyande nora fine trape lo promyé kalité. Mé mi prévien aou, kan oute vyande sar bien paré, zordi konm domin wi sava dann mon marmite. Tizan la fé in gran sourire épi li la di : « Ségnèr Grandyab wi fé amwin bonpé l’onèr… »

A suiv dézyème boute samdi proshin.