Lakey lo sit > Chroniques > Oté
Zis in pti réglaz dé B 787 a s’ki paré !
mèrkrodi 8 zwin 2016, sanm
Matant zélida la ékrir Justin :
Mon shèr nové, mon spès salté, rouj-de-fon dovan l’étèrnité,
Mi pans ou devé t’ète vèr avèk la ont, ansanm la kolèr, kan zot bann de rouj la aprann mésyé didier-an pèrsone-la parti mla-ba dann l’amérik pou ramenn in l’aviyon flanban nèv, an arandan ké lo dézyèm i ariv. Biensir zot lété pa d’dan, mé nana kant mèm soisann-dis pti kolon-moun bien - La Rényon la gingn fèr lo déplasman é tout lo komantèr an bète zot i pé fèr i sèrv ar pa de riyin : Air Austral la nyabou ashète dé l’aviyon an nik Baya é zot i vé zot i vé pa, lé parèy. Tok ! Pran sa pou toi !
Justin la fé pou répons :
Mon vyé matant k’i koz toujour la boush rouvèr, i parétré l’amour i rann sour épi avèg ; Dann out ka sé lo tro d’amour pou Didier l’apré rann aou konmsa. Konm di lo kont : sé pi d’lamour sé d’la raj. Pou kosa mi di sa ? Pars figir aou matant so bann l’aviyon, pèrsone i vé pa ; li lé tro lour, li boir tro l’ésans, li lé fèb késtyonn distans : i fo li fé La Rényon Pari an dé kou. Daouar pou sa li va fé sinplemen Mayotte-Pari-Mayotte. Arzout ék sa son motèr i tonm an pane tazantan : i di par inn solman mé konm i di zamé inn sann dé. Alor oi in pé sak i pé arivé ? Moin pèrsonèl li trap ar pa moin, mi pé dira ou.
Par l’fète, ou i koné l’avion Mayotte Pari l’a pa dékolé ? I paré li la pa sort La Rényon pou alé Mayotte. Li dévé dékol lannmin, é robolote li la pa dékolé non pli. Zis in pti réglaz pou fé a s’ki paré !… Mi pans in pé i kroi nou la tyé kouyon pou prann son plas ! Tok ! Pran sa po ou !