Ala koman La tourn lo do avèk l’éspri d’travaye !

Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité vi k’zot lé vif pou sote dsi in prozé é pou réklam la patèrnité pou Paul Vergès, mi tienbo de dir azot sa i fé sizan Vergès lé pi prézidan dann La Réjyon é dopi so tan-la lé shoz la bien avansé. Zot téi koz dsi l’otonomi énèrzétik é sak l’apré mète sa an plas sé Didier Robert, ké zot i vé, ké zot i vé pa. La prèv ? Pass partou dann la Rényon é zot i apèrsoi nana plizanplis bann z’ékipman pou l’énèrzi solèr. La prèv ankor ? La santral solèr kouplé avèk l’idrojène dann Mafate. Alor koz azot dsi yèr, mé domin lé an marsh zordi é pa avèk zot. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr mi tienbo de rapèl aou ké La Réjyon avèk Didier Robert la kass in kantité projé La Réjyon, dann tan Paul Vergès l’avé dann son karton. Si tèlman ké a l’èr ki lé, l’otonomi dann l’énèrzi nora été an bone voi é sé kant mèm pa lo ka ni pou 2020, ni pou 2025, ni pou 2030. Konm di lo kont, si i shnaj pa d’braké, i gingn ar pa la kours !

Mé m’a dir aou inn-dé projé Paul Vergès n’oré zamé fé pars i sava an sans kontrèr lo dévlopman dirab : inn la rout an mèr, dé lo monoraye rant Sin-loui é Sin-Pyèr, in sort de train pou in park disney k’i égzis mèm pa, é sirtou l’éspri l’amizman, lo gaspiyaz, la frivolité - lo konsèy i amiz !-, l’apré mète in pé partou olèrk l’éspri d’travaye. Pars l ‘éspri d’travaye té bien la mark La Réjyon dann tan Paul Vergès lété prézidan. Tok ! Pran sa pou ou !