Lo group mizik Bastèr na 20 an. 20 lané la mizik dann ron in mouvman lasosiasion i vé mét anlèr lésprésion kréol, nout lidantité, nout kiltir. Li lé pa tousèl, na in bonpé group i batay dann minm sans, na lo minm zidé si nout péï. Bastèr la tras son somin dann la mizik, la fane son kozman dann kabar la Rénion, dann zasosiasion.
Promyè débi, lo group i sort dé trwa prodiksion la tourné sanm kamarad, sir é sértin li serv dévlopman kiltirél rénioné. Bastè i koz toultan si nout métisaz, nout batarsité, épi si nout louvertir si bann kiltir déor. Èk lo tan li la ni pli for é pli mïr. Partou La Rénion Bastèr la toush domoun dann kèr, é dann péï déor paréy. Plis i sa va pli Bastér i zwé déor.

Zordi, spéktak Thierry Gauliris i amont sanm in takon mizisyin i vé mét anlèr lo travay bann zaktèr kiltirèl la fé sé dérnié 20 an. Li vé amont osi lo batay, lo bann rovandikasion mizisyin réyoné, artis, lotèr, fézèr la mizik, tout sak la mét ansanm, san débouzé, pou ranfors sak i fé nou lé rénioné.
Pousa, Bastér la invite so bann dalon zarboutan, i roprézant nout péï. Sakinn va shanté in romans Bastèr, sak li nora swazi. Anparmi nana : Alain Joron (kréatèr lo group bastèr), Firmin Viry (i kri Thierry son zanfan), Gilbert Pounia ék Annie Grondin (Ziskakan), Danyèl Waro, Bernard Grondin (Ravan), Frédéric Joron (Ousanousava), Jean-Claude Viadère (karousèl, lantant maloya), Jean André Joron, Guito Gauliris (lo fra), Nano Daprice. Tout ansanm i sa nir fét so laniversèr spésial, ék bann mizisyin bastèr. Débi mwa proshin, dé zèr trant minit la mizik i attann anou, i attann azot si koté Téat Sin-zil lo 9 et lo 10 mé, si l’kou 20 ér.

Pou so vintyinm laniversèr, Bastèr i sorte in liv partision (196 paz) i kont 25 romans lo group. La fali dé zan pou fé ali kom i fo, pou mét anlèr plis ankor nout lésprésion kréol. Liv partision-là lé fé pou toute bann mizisyin i apprann la mizik, ou sak i giny lir la mizik, koma zot va giny war tout bann koté la mizik Bastèr (Gitar, piano, vokal). Liv-la va trouv in bon plass dann bibliotèk é dann tout bann zandrwa la kiltir.
Épi pou arviv lavantir bastèr, pou gar in trass i giny ékouté vréman, in kompilasion "Bastèr 1983-2003", i romont lo dizinn lalbom la fine fé. In diks pou mark lo kou, ék inn ti tiraz (2000 diks).