Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Bayalina

Lindi 1 oktob, dézièm morso

Bayalina, par Axel Gauvin… in roman dann la lang kréol rényoné, an fèyton dann Témoignages -37-

mardi 26 mars 2024, sanm Axel Gauvin

(Mano èk Rémon, i trouve lœ* nouvèl diréktrisse zoli : èl lé blan ! Soubaya lé pa kontan ditou èk zot manièr-voir rassist-là).

Mi koné pa si i fo – trankilman – koze sanm ce 2 kokol-là, di azot zot la-zamé rogarde désértêne fiy noir konm i trouve dan léba ? Sança, pou ce késtion d’ koulèr-là, ral lœ compte sanm zot ; done azot, si i fo, 2 bon mayok dann koin la guèl, pou amontr’ azot si noir plus vilin mèm ! Sinonça pa di rien ? Kite azot pou la valèr ? Alé ! Kite pou la valèr ! Kite azot aspèr zot didine.

Zordi lindi, va done forséman bëf pou manzé. E amwin, bëf...!

Mi atann l’hèr pou détorti mon depain-debèr. Devan lézot lé pou bave devan zassiète vide, mwin la poin lœ kèr atake mon manjé. Pourtan, mon ventr’ i danse kadri la faimval ; mon tripe i kriye tire ; lœ pti, la mère, lœ rosh, mi manzré. E mwin lé pa tou-sèl : 3 mètr’ distanse ou i antan lœ ventr’ Ari pou gargouyé. Lœ pov Ari ! La faim lé pou manze ali par en-d’dan. Mwin la pèr d’in mti néstan marmaïy-là lé pi kapabe süporte la faim, i largue in gro pléré ! Ça va fé mal Lina…
Rémon ossi, kan-mèm lé pa goulipia pou sink fran, i anpé pi. Koze pa pou Mano ! Vèye pi pou Guèl-Roz ! Lé 2-là (Mano, Guèl-Roz) i gaingne pa sanpasse alé guète par la porte, pou oir si manzé i débarke pa. Tanka lœ Adèl, zassiète vide dan la min, li tourne dan la kantine parèy in koshondin ke son maite la-pa done zérb depi 3 zour.

Toudinkou, bann santinèl i kriye :
– Manjé ! Manjé i arive !
Toute i kour vittman zot plasse, i sote anlér, i danse ziska.
Lé vré k’ lœ manzé i arive. Ivone – 3 fiy fin-détide par déyèr ansanm – i porte manzé-là, parèy i prézante in kado pou lœ roi d’ France.

Axel Gauvin


Inn modékri, inn ti lavi, inn komantèr ?

signaler contenu


Facebook Twitter Linkedin Google plus