Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Bayalina

Lindi 1 oktob, katrièm morso

Bayalina, par Axel Gauvin… in roman dann la lang kréol rényoné, an fèyton dann Témoignages -39-

samdi 30 mars 2024, sanm Justin

Kank la-fine règ lœ ka lœ pain (vittman-vittman i arète rienk in mti guine la farine krü, détroi zékli la kroute i gaingne mèm pi trapé si tèlman lé fin ), kank la-fine manze toute lœ pain, là, soman, nou la-apérsü lœ “kari” : st’in drol pti piton la filasse zone-oranz èk 2 lamèl pti kaniki konkonme pozé dessi la tête anlér. Drol zafèr pou vréman ! Drol pa drol, Ari sé-d’ tir in bon plote pou li, sé-d’ bour in bèl boushé dann son gran kavérne bordé-lœ-dent. Touttsuite pou touttsuite li arkrashe, li fé la grimasse :
– Lé pa bon !

Rémon ossi i trouve ça pa bon.
Pou Mano, lé "san gou ni santiman.… daoir in manjé zorèy. Po komansé lœ pain la done anou..."
Mi trape in mti guiguine, mi goute. Mano na rézon : lé ni bon ni mové : lé plate. Mwin la zamé manze manzé zorèy, soman toute demoun la-fine éssèy ça i di la pi rien pou niabou tire lœ fade la-dan. Zépisse : zot i koné pa ! Safran, massalé : zot la-pa zamé vi. Ziska de-sèl.…

La diréktrisse i débarke. Pa vilin ditou lœ pti fanm. In robe kalou pou vréman ! Soulié vérni, talon zégüiy ! Epila, in zoli sourir en transh papaïy… Soman, lœ papaïy la-vni èg, la lèv la-pinsé, kank èl la-vi nou té i tonbe pa dann son filasse jone ! Èl la-di :
– Mais qu’avez-vous donc contre les carottes râpées…
Èl té si tèlman en shabouk, nout toute la-gaingne la tranblade !

Epila lœ tangaz èl la-fé pété, kank nou la-rœfize manze son bistèk bëf. Pa rienk amwin : lézot ossi ; soman bann’a, pa pou amêne la rolizion. Mé oté : atake in gro morso la viande la-shode sinpleman si lœ 2 zou-là !… Mano, parlfète, la-éssèy débate ansanm la siêne, li la-done ça in coup-d’ kouto, soman kank la-komansse ségné, la-komanse pisse lœ sang, lœ kèr Mano la-lévé, épila lœ morso bléssé la-artourne, dann gran pla sanm son bann dalon.

Axel Gauvin


Inn modékri, inn ti lavi, inn komantèr ?

signaler contenu


Facebook Twitter Linkedin Google plus