Zordi – déssizion la diréktrisse nouvèl (ouça èl la-parti ankor cèt-là ?) n’i assize pa pou nou manze nout manzé. Zordi : "Nous nous asseyons pour prendre notre repas" !
Pou komansé, bann plus gran fiy la-garni la tab avan n’i ariv : zassiète (zassiète vide !) lé braté, in koté sanm in foursète, l’ot koté sanm – vèy pa ! – kouto ! Dsi l’devan, in verre (en verre !) i fé lamour èk in gran bro dlo. Toute ça, parlfète, pou nou, garson ; parsk bann fiy, lœ bro… compte pa dsi ! Dabor inn, néna poin assé ; épila, fé tienbo dboute in bro ou, dan la pante zot tab suifé sanm la grèsse kari ! Alorse, shak fiy na son verre lé pozé dessi plabor pou lankrié. Soman, pou boire, mèm si la-pi bezoin zot i sava, konm avan, tête kanal-manman-delo, i fo zot i ranpli lœ verre sanm 2 karaf lé pozé dessi lœ bor la fénète.

Bann Mano-Rémon, zot, zot la fine oir nouvèl diréktrisse-là. Plus ke oir pou Rémon :
– Taleurla, mwin la louk aèl dix minute au moinse. Mwin la-dmann po alé pissé, épula, oleurk, mwin la kachète déyèr pié d’ mang. El i kozé sanm madanm Timoun… In kar d’heur, mwin la argarde aèl ! Lé joli, à n’pa dir ! In joli nez ! Inn joli bouche ! Epula, inn robe katalog ! Tamèr k lé joli !
– Anplus (Mano i mètte dessi), anplus èl lé bien blanche !
– Lé vré k èl lé blanche ! Konm delé !

Lo 2 gran kouyon ! Parsk lé blan, lé zoli ! Si té konm ça, Ivone, gro katosse Ivone – gro Ivone vilin konm lœ diabe-là – parsk èl lé blan konm kashé laspirine, narté lœ plüs zoli moun dessi la tèr ! Lina, pou pran in ka, son zoli lé pa son koulèr ! Son zoli : la tournir son corps, la moulir èl néna san k’èl i rode mètte. Son zoli : son zanm fin, son kolé tijé... touléka, koulér, pa koulèr !

Axel Gauvin