Manzé i débarke : Guèl-Roz i bave ; Rémon i bave ; Adèl i bave ; Ari… Koué ki fé d’Ari ? Ari ? Mi oi rienk’ son dos : Ari la-parti zoinde "son" tiaptiape. Soman, Ivone, kank èl i passe koté d’ li, in kou-d’ rin mèm si lœ koté, i anvôye lœ marmaïy déboule sink mète distanse. Ivone, fièr parèy bann portèr ce bann zizite Savorgnan de Brazza navé labitide done bann shèf laba Kongo, Ivone, i poze 2 pla dessi la tab, la tab lé plus prés la porte : nout tab anou.

Dabor inn, n’i oi rienk lœ pain. De-pain ti-zoli, vié fra ! La kroute lé roz parèy roti volaïy, la mie lé blan konm sapotiy – parsk, figuire azot, de-pain-là, li arive koupé, koupé, vié fra ! Zist bone-à-manzé !
Nout boush i fé dlo : daoir de-pain-là lé bon vèye pa koman ! Daoir la mie i fonde, daoir la kroute i kronme dessou la dent. Pou komansé, de-pain manzé fantézi ! Mé de-pain konm ça-là, ça gato, ça déssèr ! Mètte la miêne à koté : li fé pitié ! Lé blème pou roz, férblan pou blan ! Si lé pa tro tann... lé tro dür. Si la pa rassi… lé mol. Mérsi Bondié ankor, si i trouve pa in gran fil gouni d’dan... ossinon plus sèryié ankor !

In bat’man d’ zié, de-pain la-pi. Mon part ossi la-fané. Mi réklame mon dû. Ari (marmaïy-là i yème amwin sirman) Ari cé-d’alonje zantiman pou mwin inn lœ 3 transh li té i pèz la min dsi. Mano – 2 kèr soman – Mano i rande amwin son gro bénèf-volèr – 3 transh li té i tienbo ! san compté çak li la-fine bouré…
Pain-là lé bon ! Mi lishe mon doigt.

Axel Gauvin