Modi kantine d’in modi lékol ! E kamèm ça, mwin l’arvni ! Pou fèr koça ? Pou fatigue mon tanpéraman sanm troi goulipia gran guèl, sanm in tonbe-kriz mavouz, sanm in mti mâle la lang lé pointi konm sèrpan… Epila l’ot là, l’ot ankor, va arive d’in néstan, va pète à rire parèy… parèy … Ah ! mi vé pi anmar mon kèr sanm cèt-là ! Mi vé pi !

Ari la-tire in piton dan son pla d’ manjé ! De-riz bité ! Morso la viande en tralé ! La sosse ? Dekoi pou noiye in kabo d’ fon vivan ! Mon part en antié lé dann son zassiète ! Mwin noré lo droi nérve in kou : mon manzé lé pa la komine ! I pèye p’amwin pou angrèsse lo frèr "Grizète-la-bronze-dessou-moustikèr" ?
Soman, kèl nérvé mi pé nérvé kontr’ Ari-là ! Ankor si li té i ressanble inpé son sœr ! Soman, apark lo kodêne son figuir, li na poin rien pou arsanble aèl. Touléka lé pa son gro kabèsse (1) tro lour pou son kolé tro fin, lé pa son pié noundi (2), lé pa son léspri tro kourte…
Mwin na poin la kolèr kontr’ Ari. Mwin la poin la pitié nonpli ! Mwin lé zalou d’li, Zalou ! Mwin sré anvi ète Ari. Mwin sré anvi d’ tape dan mon manzé, kiyèr vayan, kèr klér, boush kontan. Mi mazine :
– Manze té Ari ! Manze out manzé ! Mi éspère pou aou, zamé ou i tonbe arpa dann matrape (3) bann fiy !
Zisteman azot-là i arive. Mi bèsse la tête. Mi argarde mon zassiète vide, vide konm mon kér.
– Baya ! Té Baya !
Ari lé pou kriye amwin ! Kèl krié ! In pti louète-la-onte, in sékré-anmaré ! Dawoir lo zafèr lé séryé, inn fois li la-ziska anvale son boussé manzé avan. Mi sent li alonze in nafèr pou mwin par dsou la tab :
– Mwin la-oubli done aou ça, iér.
Ça, st’in mti zanvlope la-fabrik ansanm papié kadriyé. In zanvlope krazé, gomé la poussiér…
In lète ! El i ékrire amwin lète ! Ah Lina !
E koçak mi oi dessi lo kolaz èl la kole sirman sanm deux grin de-riz ?

F. P. M. B.

"Fermé Par Mille Baisers" ! Pardon Lina ! Pardon ! Pardone amwin !
Békali k’ mi yème aou !

Mon lète, mi sèrre ça à la voltiz dan mon shemiz. Mé soman, Bondié fé k’ lo temps i koule vitman pou mwin gaingne lire mon lète, mon tou-sèl, déyèr pié mang par dann fon la kour lékol !

Axel Gauvin

(1) Kabèsse, kabèsh : la tête.
(2) infirme.
(3) pièj