(Titone, la-passe son "l’exclusion" po konpoze romanse kontr’ Gro-Ivone).
La boush Ari i rire tou-sèl kank li antan ce bann romanse-là, soman Rémon – ankor in ot, Rémon-là ! – i arète pa tire défo, sirtou dessi lo dérnié romanse :
– Vi voi pa la finission vot bann romanse i tonbe pa bien parèy ! Dann inn vré romanse, le finission i jumèle bien. Ékoute in coup…
Epila, Rémon, sé-d’ mètte à shanté :

Fiers gaulois z’à tète blon-deu
Nous marchions tous à la ron-deu
Si pour nous l’orage gron-deu
C’est nous qui gardons l’accès
Du sol français …

…"Blon-deu", "ron-deu" vou mèm, v’i voi la finission i arvien parèy… out romanse lé pa d’ vré romansse : i imite. Ça mèm !
Lo dékriaz Rémon i fémal Titone, li sanplingn :
– Lé presk parèy.
Pou konsole ali inpé, mi di :
– Lé ziska plus zoli k’ si lété parèy, parèy mèm.
Ça i défande pa Rémon ashève krazé mèm :
– Anplus, li arvir, "i sent kouttkongn" ! Mé oté, kouttkongn, ça na poin d’ lodeur ! Sépa si lo galé ou la-kongne dedan, i santi pu, foutor ! Sansa out gro doi d’ pié ! In kouttkongn, i fo lu sent lo sang, épula lo sang i sent pa rien.

– Amwin, mwin la-pa jamé gaingne kouttkongn.
Ça Zilbèr, i koze, là. Li di ça pou fé son vantar sirman : rienk Zilbèr mèm, sanm son tonbe-kriz, lé assé malade pou ète oblizé mètte son "zanmari au blok" – pou mètte soulié, alorse. Ankor, ki-fouti soulié : 2 vié soulié garone, daoir i pu fromaz.
Titone i plère à sèk dann son dépitassion. Mi éssèye konsole ali inpé. Dabor inn parsk, zordi, li lé assé bon marmaïy pou pa pran la kolér. Epila parsk son romanse lé pa si tèlman en kiddbol : la mizik i kole bien dessi lo parol. Lo lér, li zoué ça ossi dessi in pti kordéon-a-bouche ke la-pèrde la kok, lo lamèl i gaingne la tranblade kank i souf dédan. Son mti "mizik-là-guèl", Titone i tire ça dann son posh en kassiète : li na la për la diréktrisse – passon pou lo gro zié èl va fé, lo kozman en bobe èl va trouve pou di – li na la për èl i trape son kordéon, èl i sèrre ça ziska vakanse dann son tiroir à klé.

Lina la-tire lo nœd d’riban dann son shœvé. I fo woir aèl, astér, arpousse en aryièr son lav-volkan pou pa li vien dévide dann son zassiète !

Axel Gauvin