Avan k’anou garson, nou i sorte dan la kour lékol pou nou rantr’ dan la kantine, 2 plüs gran fiy (k’i sorte plüs bone-hër zot lékol ékspré) i komanse dépoze lœ zassiète manzé : nout zassiète anou dessi nout tab-tréto, cète bann fiy si lœ banc, pangar ça va glissé dessi plato la tab en pante. Kank i ariv l’hër pou nou manze nout manzé, ça la-fine fré, épila, la sosse la-fine tranpe toute. Ke lé fré, lé pa grav ; la sosse nonpli, soman pa ninportékèl sosse, pa la sosse bëf...

Zordi, Ivone, kank èl la-fine sharze son zassiète aèl, olérk poze ça dessi biro pou anval son nafèr en goulipia, i rale son gro dèrièr ziska nout paraz. El i vien koste son gro kuisse sanm nout tab anou. El i argarde amwin. Mi sent i fodré mi manze, ou-sinon si i gaingne pa, fé sanblan au moins. Soman in demi küiyèr la viande-bëf-là dann mon boush, lé sür mi vomi mon léstoma.
Ivone i mètte in boushé manzé dann son boush. Pou in kou èl i pran lœ temps pou mashé. Èi i éspère in pti ninstan. Èl i éssuiye son lèv dessi la mansh son robe :
– Mwin té sûr ou noré pa manjé.
– Manmzèl, mon rœlizion...
– “Mon rœlizion”, “mon rœlizion” !! Soman, en atandan, lanmérdatoir lé pou lézot : un jour va oblije amwin sérve aou apar.
Ivone i deboute ankor in néstan devan mwin. El i éspère sirman mi réponde aèl. Pa si bète, Soubaya, pou li alé rode boubou pou son corps pou rien…
Boudikonte Ivone, bandé en 36, i fini pa arkole son semin.

– Toultan èl lé rède en keu d’ beuf konm ça-là, Mano i di.
Mano i prétan shalèr Ivone-là i frédi, son zamal i tonbe, rienk kank lœ temps zéléksion i arive, kank lœ maire i sorte en ville pou zot deu Ivone avane, ansanm, mayi dan la vane.
“Si ou i voi koman la boush Ivone i aranje, kank son makro i débarke : lé fandu en tranche papaïy kolonbo. Soman, pa tou lé jour la fète chinoi, alorse, plupar-du-temps, la gueul manmzèl i alonz en muzo d’ ra muské.
Li ardi ankor :
… Anvôy chié Gro-Taba !

Axel Gauvin