Zordi cé lœ zour la viande bëf. Sépa akoz, soman rienk kank mwin la-vü Ivone pou tire manzé, là, mwin la-majine lindi lœ zour la viande bëf. Kasse pa la tête : mwin va trouve in lokazion, avan la klosh 2 z’hër, pou mwin noiye mon faimval dan lœ ji kann-bonbon.
Si, kan nou i arive, manzé té pokor sèrvi, mwin noré tire in bon pti piton de-riz, inn loush bor-en-bor pois d’ Cap. Rémon noré done amwin in mansh piman-la-pate – li néna in zoli bokal li sèrre rantr’ son 2 zanm kan li manze – épila mon panse noré rèste trankil ziska-soir.
Soman, nou i tire pa nout manzé par nou mèm. Ivone i tienbo la küyiér. Po in kilo d’ létshi, èl i largré pa lœ droi sharze mon pla sanm son kari bëf. Amwin, pou cent kilo, mi dmann pa aèl rien.

Pou tire lœ manzé, Ivone i assize koté la porte dessi in pti tabouré anpayé. 3 bèl marmite otour d’ li. Lœ prœmié : dœ-riz. Dœ-riz gri, kassé, krazé, dizon moulü mèm. Grace madame Timoun, lœ küizinièr k’i tié son kadav pou lave ça, arlave ça, dœ-riz-là i arsorte inpé zoli, prèské blan. Soman madame Timoun i voi pi klèr : èl i gaingne pi démiste lœ bann pti galé k’i zoué loukashiète sanm èl. Porte bien antanssion galé-là, si ou i yème inpé out dent !
Dézième marmite : lœ grin… Lindi : gropoi. Mardi : lantiy, épi zariko rouz lœ réstan la semène. Na in afèr pou konprann ladan ? Soman kissoi l’inn, kissoi l’ot, madame Timoun i fé kui son grin en leau, "pou bien fé déssande lœ riz".
Troizième marmite : kari, sança rougaïy.
Ivone i tire manzé sanm in gran loush. 2 loush büté dœ-riz – pou lœ plüs gro kapor zélèv, konm pou lœ plüs pti kaniki. Apréça, in loush lœ grin. En dérnié, in demi loush kari (plito ke d’ mètte ça dann bordaz lœ ri, èl i fane partou dsi). Lœ mèm loush i ansérve pou lœ 3 marmite. Konmça, inn i gome l’ot !

Axel Gauvin