Toute bann’a i apèl Ivone "Gro-Taba", ou-sinon "Taba-Vert”. Akoz, i prétan dire èl i mètte pa kilote, épila, kank èl lé mal-assiz dessi son mti banc, i oi son bèl taba-tapounang. Dakor pou "gro", passon pou "taba", mé soman "vert", akoz "vert" ? Toute-fasson, amwin pérsonèlman, apark la peau bigarade son dedan d’ kuisse, mwin la pokor vü inn tior. Pourtan, lé pa akoz i éssèye pa, oui ! Ça lé pa in nafèr pou fé pèr amwin ! Gaingne kolé-torte nonpli… Somanké ce bann pti valal, kourte konm zot i lé-là, lé mié plassé k’ mwin pou tire kornèr atèr konm ça-là rantr’ lœ deu kuisse Gro Ivone ! Amwin, mwin la-pa zamé gaingne oir lœ taba "Gro-Taba". Débrouy !...
– Anvôye chié "Gro-Taba". Anvôye aèl chié ! I argarde aèl ça, si ou i manje pa !
– Ou lé fou ! Mi yème mon corps, mwin !

– Gro-Taba ! Gro-Taba ! Taba Vert !
A-ya-yaïy ! Na inn (ke sirman la-kashiète dessou la tab) la-ravaze lœ guèpe mon plasse : Ivone i vole dessi mwin. Poin lœ temps di rien, èl la-fine boshe amwin par mon shœvé :
– Spesse massala ! Malbar langouti ! Artourne dan l’Inde ! Mwin va fé anvale aou out “manje-pa-beuf ”, mwin !
El i pèze dessi mon tête ; i boure mon figuir dann manzé, i kraze mon figuir dan lœ riz, lœ kari bëf. Mon boush lé plin, mon nez lé plin. Mi toufe, mi toufe, mi sar mor...

Axel Gauvin