Pou lo manzé, i arvien konm avan, apark Ivone i tire pi lo manzé : lo riz, lo grin, lo kari, lé sérvi séparé. I mètte ça dann gran-gran pla ke bann plüs gran fiy i poze, dessi nout tab – pou nou garson – dessi biro la métresse – pou bann fiy.
Kank i di "plüs gran fiy", touttsuite i mazine "Lina", akoz lézot lé mizi’ng à koté, Soman – sépa akoz ? – Ivone i soizi pa aèl zamé pou done in coup-d’min.

Lina, Lina, Lina ! Toué na rienk fiy-là dan la tête don ! Samèm toué néna pou maziné ! Akoz ti argarde pa, plito, lo malkadik – lo Zilbér-Tonbe-Kriz – lé pou gonfl’ koman dindon aforstan d’ kroire par li mèm, par son monmon, vré manzé l’arvni ? Akoz ti vèy pa lo Mano, lo Titone, la pou amonte zot domino parèy grénade i pouri au pié ? E Ari, koué ki fé d’Ari ? Li rire dan la barbe ke li na poin. Li boure lo manjé ?… Non va : pou koça bouré ? Manzé i galope tou-sèl dan son bouss ; bann morso la viande i déboule par zot mèm dan son léstoma. Gro-gro gazon do-riz i koure zète zot kor dan ranpar son gozié.
E lo Ivone ! Gro moutiouk Ivone-là, na pa bezoin roulo pou foule son panse. I pran pa nonpli lo temps éssuiye la lèvr’ gomé, zordi-là !
Otoué Soubaya ! Zordi depain na poin, ou i vé èl i éssuiye son boush sanm in grin do-riz ! Out zézié lé mal viré koman, don !

Alapak Lina i arkomansse dévire la tête nout koté. Daoir èl la onte son frèr ke lé pou goulipiate manzé parèy kadine… E amwin, amwin, olèrk mwin lé zalou d’Ari, olèrk anvouloir d’ li pou la plasse li pran dan lo kèr son sër, olèrk – mwin té ziska anvi talèrla ! – olèrk gougnarde ce léspesse krévèr Ari-là, la onte i pèz amwin atér. Pou Ari. Pou lo mavav Ari. Mwin la onte pou li pou Lina.

Axel Gauvin