(Manjé l’arni konm avan. Ary i manje konm in goulipia. Soubaya i éssèye frène ali po pa li fé onte son sër)
– Anbale pa, té Ari ! Out manzé i atann aou ! Li na poin pou gaingne lazèl, li !
Kan-mèm mi koze dousman sanm Ari, mwin na la krintiv na inn, talér, lé riskab i antan amwin épila i gougnarde in coup, i apèle amwin "gran bofrèr". Mwin na pèr pou rien : bann’a i akoute p’amwin. Zot i ékoute rienk zot ventr’ . Ari ossi : i fo mi trouve in manièr pou li antann amwin san k pérsone i koné pa. Mi sar pa toushe-toushe ali. Mwin mèm, mi détest’ kank-si demoun i trape-trape, i plote-plote amwin ! Mi poze mon mansh foursète dessi son bra. Ari i lèv la tête.
– Manze pa tro vite.
Mon kozman i koupe nèt son lélan. Li guète amwin, li guète lo morso bëf mwin la-kite dann pla. Li arkomansse manze dousman pou pa mi kalkil li lé movèz foi, soman traka, traka ! Traka i roule bor en bor dan son zié. Li argarde ankor in coup la viande-là. Li argarde Titone. Li argarde Rémon – in marmaïy pourtan i forse pa zamé dessi manzé. Ziska Zilbér-Tonbe-Kriz, boukar-en-shèf [1], li argarde, en bob ankor …
Çak i déshoune [2] lo kèr Ari lé si tèlman fassil pou konprann ! Li fé si tèlman pitié d’oir ! Mi kost lo pla la viande sanm mon zassiète :
– Pou ou mèm mèm, ça. Si ou i manze pa tro vitman.
Lo kontanttman lo boug !

Konm mi voi là, Lina i manze pa plus ke mwin.

°0°

Ziska déssèr i done zordi : in fig [3] par moun.
Toute ça bann zanfan zabitan-là, i koné rienk fig mèm tou-lé-zour, soir é matin, matin é soir. Soman, cèt-là lé mür pitaklé, i rale la boush : zot lé kontan. Mi done la-miêne Ari : li lé 2 fois plüs kontan ankor.
Pa-sito èl la-fine gaingne son fig, Lina i d’boute, i fé in détour, i passe déyèr son frèr :
– Ala pou ou, Ari !
El i voi lo déziyèm fig son frèr i gardien dessou son min. El i argarde amwin, èl i sourire. St’in mérsi sourir-là ! Plus k’in mérsi : in kado, in rotour ! Lé si tèlman plin la promèss… mwin sré riskabe pa trouve drol si, touttsuite-là, èl i di amwin :
– Inn foi Ari la fine gaingne deu, nu koupe cèt-là rantr’ nou ?
Té mon Lina !

Axel Gauvin