Bann fiy i arive, lansé. Zot lé pou rire gozié plin. Lina dann tas. Pa plüs pa moins en mar ke lézot. En-joie plus for k’ toute soman. Son rir i rale amwin. Rienk son rir, don !… Dabor inn, èl i panshe devan pou èl pérse son gran shevé (son gran shevé rouz-là !). Apréça èl i ardresse droite. Son robe mousline i colle dessi son corps. Toute çak mwin té i voi dan mon lidé, mi voi pou d’vré. Toute çak mwin té i karèsse dann mon pensée, mi karèsse – sanm lo zié – pou toulbon. Mwin té i rève rin guèpe, rin guèpe èl néna pou vréman, i fini en palikoune (1) pomé soman. La kuisse lé bien ron malgré vakanse, malgré la faim èl la-sübi dann vakanse.
In coup d’ tête, èl i anvôy son shové en aryér. Son tété – san pèz (2) : ouça i tire larzan pou ashté soutien ? – i pike au sièl : deux brinzèl pointi, plin koman brinzèl, dür parèy brinzèl-mèm, mi majine. Zot i rale à mor. Lanvi i bouiye dan mon sang…

Lé tro sîr la-poin rienk mwin néna lo zié. Lo deux samèr d’ Rémon èk Mano ossi lé pou louksire (3) aèl. I arète pa. Mi di dann mon kèr :
– Rémon spèsse salo. E ziska ou, san-zëf !
Rézman, dessou son gran kane-mami (4), la diréktrisse i arive, sanm in bèl paké zournal dann in pti soubik vert. Bann fiy, inn apré l’ot, i sar kassiète déyèr lo gran golaz la-rouvèr en gran. Pou pa tonbe malade sanm zot robe tranpé, zot i sar mètte in triko d’ peau en “Gazette de l’Ile de la Réunion" – inn fèy devan, dessi léstoma, inn fèy dérièr, dann dos.
L’hèr Lina lé pou aranze aèl in pé sanm son linz en papié, mi éssèye trouve in manièr – trouve pa ! – pou fé sorte Titone dessou la tab : son souplingnman lo shien la-manze la poizon i fatigue amwin. Toudinkou, Rémon cé d’ pète à rire. Mi lève la tête vittman : daoir li lé pou gaskone Lina, li lé pou… Lé pa ça, soman dann dos mon Lina zisteman, par la toil leau d’ plüi la-klèrsi, en gro lète lank noir lé pou sali la robe :

MAISONNEUVE BIEN PLACÉ POUR L’EMPORTER.

Axel Gauvin

(1) In ot manièr po di lo dérièr… kan lé bien ron.
(2) Pèze-tété : soutien-gorj.
(3) Argarde en malfondé.
(4) Paraplüi, golaz.