La lète Lina i fé ri mon kér, i fémal mon kér. Dann zanvlope rienk – son lidé, mon lidé ! – in mti violète èl la-fé sèk pou mwin ! In mti flèr i avoué èl i yème amwin. Soman mwin la-lire tro vittman son "F. P. M. B." : lo B, kank èl té fine ékri, èl la-barbouy ça en G. Mwin noré préféré pa niabou lire lo mo konplé èl la-trasse en mti kaniki lète :
Fermé Par Mille Grains de Riz.
Si èl i yème pa amwin, akoz lo pti violète ? Si èl i yème, akoz alorse ce léspesse foutan dessi lo zanvlope ?

Merkredi 16 déssanm

Lé sûr èl i amêne amwin en sharète shaviré. Mé soman, amwin-là, mwin lé pa bëf i rale par férdné dan la savane. Mi éfasse aèl dan mon mémoir. Poin final. El i égzisse pa, el i égzisse pi, èl la-pa zamé égzisté.

Çak i éspasse dan la kantine pou lo tiaptiape (1) lé 100 fois plus intérésan. Konm la kantité d’ manzé i done anou ! Zordi deux kari olèrk inn tou-sël. De-riz en déliz. Bon déssèr !
La lang bann Ari, Titone, Mano, Adèl, éski-san-sui… la-p’assé pou balèy toute : na tro, tro mèm. Tèlman tro ! Gro Ivone i rire dan son barbe !
Mano i di dan mon trou d’ zorèy :
– El lé kontan pou la kantité d’ réstan, épula, lo maire la-komanse son rénion zéléksion, daoir zot deux la-fine arkomanse avane ansanm de-riz dan la vane.

Ari i pran pi ditou lo temps mashé, i anvale sinpleman. I mavave (2) ! Ankor, ankor, ankor ! Mi éssèye – demande amwin akoz, ou ! – mi éssèye oblize ali sèrre inpé laryaz son boush, oblize ali ésplike inpé son ventr’. Inn tiork ! Rézman, firmezir, son kouraz goulafé (3) i diminié, i afayi, i tonbe. Astèr Ari i gaingne pi boure son kanar : la tripe lé foulé ! Mwin lé trankil !…
Kèl trankil ! Alapak li cé-d’ largue in gro pléré ! Gro-gro kaskade lo larme i dévide atèr par son zié. Lina i débarke en vitèsse, i éssèye trouve in manièr pou konsole son frèr :
– Rari, mon Rari, koça i ariv aou ?
– Manjé néna ankor, mwin la pu faim !

Lézot makro sé-d’ pète in rire en foutan ! Lo kèr Lina i sèrre. Amwin, brouyar i lève dann mon zié.

Axel Gauvin

(1) Lo manjé.
(2) I manje en malprope.
(3) Manje en goulaf, en goudal, en gourman.