Bayalina, par Axel Gauvin… in roman dann la lang kréol rényoné, an fèyton dann Témoignages -26-

Mardi 18 séptanb (dezièm morso)

2 mars, sanm Axel Gauvin

Promié coup mèm nou i voi nout diréktrisse. Pou èl tienbo dœboute, èl lé oblizé apiye son kor dessi in baton. El lé mèg konm mwin la-pa zamé vü demoun mèg. Papa, rède konm la zistisse, plito droite konm la dignité bann vié zindien, i ésplike son ka – nout ka ! – li ésplike dousman, trankilman. E lœ zié la diréktrisse i flanbe, son min (k’i pèze dessi baton-là) i komanse tranblé... Oté Ivone, ton pois lé au feu ! Toué la-rodé, toué va gaingné !
Silète Boyer i vien kriye “Gro-Taba” :
– Madanm la-di aou vien.
– Madanm la-di amwin vien ! Madame la-di amwin vien ! Po koça ankor !
El lé pa fièr Gro-Taba, soman bien oblizé alé. El i largue la loush èl té pou artire in voyaz manzé pou èl ansanm…
Ivone, mon salté, mon ravodri, toué la-rodé, toué va gaingné !

Par lœ trou ke bann masson la fine par pérse rante lœ katr’ lign bleu dessi lœ mür-là, mi voi rienk la diréktrisse sanm papa. Ivone, mi voi p’aèl. Soman aèl mèm, ce makrèl-là mèm mèm, la diréktrisse la-pou rœgardé sanm son zié k’i flanbe. Dessi son vilin mové grèsse mèm, la kolèr la diréktrisse i arète pa monté. In kolèr glassé. La diréktrisse-là i largue pa la voix, i fé pa gran jèst’, soman lœ zié ! Lœ zié, ti-frèr !
La diréktrisse i anmanshe Ivone. I done aèl son paké, dür, sék ! I boukane san krié, i done san guélé.
Ivone, oté Ivone, lé bon mèm pou ou ! Lé bon mèm !

Axel Gauvin

Padport

Signaler un contenu

Inn modékri, inn ti lavi, inn komantèr ?