Bayalina, par Axel Gauvin… in roman dann la lang kréol rényoné, an fèyton dann Témoignages -25-

Mardi 18 séptanb (prœmié morso)

29 févrié, sanm Axel Gauvin

– Baya ! Té Baya ! Out papa la-arivé, out papa lé là ! Lu lé po koze sanm la diréktrisse. Dégaje aou, Baya !
Prœmié kou, dann kantine-là, i kriye amwin par mon pti nom gaté (inn, daoir, la-antandi kank nout 2 papa, lœ zour la rantré, té pou aspère devan la porte ce modi lékol-là)…

Lé vré pou vréman gramoun lé là.
Iér-au-soir li lavé-mashe dann son dent :
« I gaingne pa kite ça konm ça-là… Mwin sar oblizé alé plüs dvan… »
Mwin lavé-pa pérde la karte :
– Ou va vnir, demin, koze sanm la diréktrisse ?
– Na oir, na oir ! En atandan, aou, demin-là… pa d’ kikilik. Lékol. Hin ! La kantine, konm si « rien n’était ». Ou i antan !…

Papa, mwin lé kontan d’ou. Mwin lavé-për ou té i largue amwin, ou té i kite amwin mon tou-sël devan Gro-Taba… Salopri d’Gro-Taba ! Ravodri d’ Gro-Taba ! Gro-Taba d’ Gro-Taba !
D’in koté, mwin té i prière Bondié pou k’ ou i vien, l’ot koté, mwin lavé-për ou i débarke en vié linz. Pa en linz déshiré — na poin moussousse la kaz — mé soman… sépa mwin, sanm in kabaïy bouton déparéyé, la posh rapiésté, lœ kol ranblé dan la pointe…
Iérossoir, parlfète, out bon kostime blan (initil dire ou néna rienk inn !) té krouté la bou. Soman, par mirak, linz-là, zordi, i klate dan la limièr in bon botan ! Kiça la-pa dor la nuite pou lave linz-là ? Kiça la-frote ça sanm koton mayi, la-brosse ça èk in léponz pipangaïy, la-rinse ça in leau, 2 leau, 3 leau ? L’arplonze ça dan jü-d’ bleu ? Kèl solèy la-lève minui pou fé sèk ali ? Plito kèl karo-repassé (l’armète 20 foi dessi la brèz) la-shasse lümidité ladan ?…
Zordi, lœ linz gramoun lé lisse konm k’i fo, i pliye jist dan lœ zoin, lé en nik vèye pa koman. Dann pié papa : soulié noir k’i briye konm grin longani. Shapo noir bor larz dan la min… Bien sir “dan la min” : lonèkté, la politèsse i komande : la diréktrisse lé là ! E konm manman té i di toultan : « na poin demoun plüs zoli manièr ke Vévèl-là ! »

Axel Gauvin

Padport

Signaler un contenu

Inn modékri, inn ti lavi, inn komantèr ?