Astér, fini : la diréktrisse i artourne dan son bann pièsse laparttman. I éssèye artourné parsk lé presk pi kapabe marshé. Alapak papa cé-d’ trape son bra pou ède aèl ! Papa lé pou tienbo lœ bra inn fanm ! Prœmié coup mèm mi voi in nafèr konm ça-là ! Lœ bra in fanm !… El lé malade, lé vré ! Malgré ! Avan k manman i mor, mwin la-zamé vü papa, mi di pa brasse manman dann son bra, dessi son léstoma (zafèr konm ça-là, i trouve rienk dann film sinéma), mi di pa brate aèl (apark kortézé, rienk bann blan lontan i fé ankor ça), mi di pa kost’ sanm èl, mi di konmsa : ne-srèsse frolé sinpleman, ne-srèsse floute la min manman, ne-srèsse lœ zong son pti doigt d’ pié, kan-mèm san fèr par ékspré ankor.
Gramoun la-toushe manman devan mwin, rienk — lœ larme dann zié — pou anbrasse aèl pou « di bonzour », l’hèr té oblizé férme son sèrkëy.

– Gro-Taba i arvien ! Gro-Taba i arvien !
Nou k lété séré inn dessi l’ot parèy semi salade, nou k’ té i alonz nout kolé parèy banbou d’ Shine, pou nou bien avèye toute, nout toute la-fané konm grin-mayi kan i done manjé volaïye, nou la-lofé konm pti poul devan la rou lauto, nou la-court assize nout plasse. E amwin prœmié dann tas !
Ivone i débarke. Èl lé pi en keu d’ bëf : èl lé en lame razoir ! La kantité d’ mové kozman ça gro férblan-la-grèsse-là la-trouve pou mètte dessi mon compte ! Dessi lœ compte anou zindien La Rényon !… san zamé èl i argarde amwin, soman !
« Mwin na pa peur zot sorslaj, zot majigador, zot siguide ! Mwin na pa peur zot jako, zot diabe ! Kan-mèm çak néna sépa konbien d’ bra-là, vien alu. Mi atande alu !..
« Mi surfou de ce diréktrisse de mèrde ! Mwin néna un mur en béton k’i apuiye mes rin ! »
Walali, walala, Ivone i vomi mèm ! In ranm mové kozman, in flopé parol en fièl ! Toute, èl la-di, toute èk inpé ! Toute çak la-passe dann son zabo torte !
Amwin ? Mi kite aèl pou la valër. Pou la valër !

Axel Gauvin