(Soubaya i rève – in rèv zié rouvèr– ke Lina i propoze ali partaje son déssèr)

Mi koné pa koman mwin va fé, soman mwin va trouve in kèr pou ce késtion d’ fig ke ièr nou noré partaze ansanm-là. Mwin va trouve in kér, mwin va di aèl :
– Ça té bon po toulbon !
– Ou noré préfère manje toute tou-sèl ?
– Narté moins bon !
El va vni rouz, rouz parèy fanbriyan [1], rouz parèy létsi mir. Epila èl va di konm dann briar [2] – son lèvr’, ziska, va tranblé :
– Po mwin ossi narté moins bon !
Ou la-vü in fronté koman Lina-là !

Vandredi 26 oktob

Mwin néna faim, si tan-tèlman faim : mwin lé sür, si tèlman sür ke Lina i yème amwin.
Mon ventr’ i gargouye, i kriye marmite, i shante la romanse le bone apéti, i mizik-en-kuiv lo zoli séga mwin-là-faim-soman-mwin-lé-sür-mi-sar-manz-ventr-plin-kèr-kontan ! Çak lé vert çak lé mir, lo pti, la manman, lo rosh, amène ! Mi manze !

Lina, son koté, lé pou plézanté, lé pou fé sanblan éssuye son lèvr’ sanm la mie de-pain… in pain pou sanblan : i done pi nou zamé de-pain pou manzé. Lina i argarde amwin fran, san kasse la tête pou lo Adèl Ponpon, san porte antansion toute lézot. Lina i rire… Amwin ossi mi rire. Mi rire akoz èl i rire. Mi rire akoz mwin lé kontan. Epila mi manze, mi manze, mi manze !
Té Soubaya ! T’i fé lékourse sanm Titone, koça, don !

Pou zafèr fig-là, mwin la-pa trouve lo kèr pou di aèl. Soman fité konm Lina i lé-là, sirman èl la-konpri par èl mèm.

Toudinkou, silanse à lodianse : la dirètrisse i rantr’. El i argarde mèm pa anou. El i sava tablo, i trape in boute la kré, èl i marke :
DEMAIN SAMEDI 27 OCTOBRE, VISITE MEDICALE.
El i arsorte san di in mo.

Axel Gauvin