Astér, devan son flèr désharmé, Ari li mèm, k’ li vé k’ li vé pa, lé oblizé d’ rire. Lina, tèlman èl lé kontan son frèr l’arvni, la-sorte son plasse, la-vni koté d’li, koté d’nou. Lina ossi lé atèr pou rire. Amwin, mon dent lé bète vèye pa koman ! Mi rire ossi ! Nout 3, nou i rire ansanm. Nout 3 ? Pa tro vré : nout 2 Lina sirtou. Kank mi en-apérsoi d’ ça, mon sang i dékaïye, i arkomansse koule boranbor dann mon vêne : mi rire plüs for ankor.
Toudinkou, Ari cé-d ’ largue son krazir d’ flèr dessi lœ bor la tab. In koudmin li cé-d ’ rakl’ lœ total atèr. Astèr li assize dessi lœ boute lœ banc, li plère. Non va, li plère pa : li rire, soman gro pléré i dévide en mèm temps par son zié. Toudinkou lœ rir i kaïye nèt, lœ larme, non. Lina i ansipli :
– Ari pleure pa ! Pleure pa !
– Mwin v’amène ankor fleur po èl, mwin ! Mwin v’amêne ankor ! El i peut compte dessu !
– Kite aèl pou la valeur, Ari !… Taleur nou va fèr in bouké pou manman !
Ari i ral lœ rhume :
– Ek joli biskusse ?
– Si ou i veu Rari.
Guèl-roz (ke la vni oir anou konm i sava ron d’ kok) i désside gougnardé :
– Ra-gri ! Oté Ra-gri !
(Li lé vissié lœ samèr d’ Guèl-roz pou li tire foutan. D’in mti néstan mwin va fé tire ali son foutan, mwin ! Mi guète in kou ça zié dann zié. Rèzman lœ boug i préfère borde son kor, kole son shemin, paské sinon… Rèzman ossi Lina la pa antandi.)
– Nou va kasse bèlzamine ossi ?
– Si ou i veu, Rari.
– Ek galabèr ossi ?
– Galabér, ça lé pa fleur, ça, Rari.
Si na inn i rire, i ménasse sinpleman d’ rire, mi plishe ali depi la tête ziska lœ pié !

Axel Gauvin