Depi komansman rœpa, Lina i dévire à-suiv la tête nout koté. Mi koné lé pa pou mwin. Dabor inn, èl i oi mèm pa amwin : kank rœgar nout 2 èl i büte inn si l’ot, èl i bèsse mèm pa son zié ! Ari, Ari èl lé pou rodé : i fé inn bone koupe de temps nou la-fine komanse manzé, épila Ari lé pa là. Lé sir-é-sértin traka lé pou manze Lina par en-d’dan. Koça i fo fé pou abate ça ? Kan-mèm pou èl mi compte pa, mi fré toute pou fé fane ce traka-là. Mé la poin rien ditou pou fé pou vréman : mi koné pa kouék i fé d’ son frèr : bann fin-d’étide-atardé lé pa dan mon klasse. Na poin rien mi pé di aèl pou détrakasse aèl. Nanpèsh, mon gozié i sèk, rienk mazine mi pé koze sanm èl.

Ari lé rienk en rœtar. Pa-sito fine arivé — zafèr-là té i anklave ali koman, ça, don ! — li pran mèm pa lœ temps assize devan son manzé : li tire dann son posh in krazir d’ flër roz ke shenig la manze lœ féy, in sosso flèr ke li la ramasse dan la kivète, in lanmsime bèlzamine roz !
Son sosso flèr-là (sosso flér, mi vien d’ di ?… sosso mèm ! Soman ça té i sent bon, si tèlman bon !) son sosso flér, Ari lavé-porte ça ce matin pou son métrèss, in métresse li té anvi fé plézir in coup si tèlman li té i trouve aèl zoli ! Ari i koné pa bouké : Ari i koné flér. Li porte flèr pou son métrèss. Toute çak Ari i porte, li mètte dan son posh. Akoz li mètte arpa flèr dan son posh ossi ?
La pionte mètrèsse-là la-pa rode flèr pa flèr, kado pa kado ! La-pa rode si, pou kasse flèr pou èl, Ari la dsande dan la kivète — kroire aou lé si tèlman fassil sanm in patte-la-klosh ! Désande rien, armonte anlèr lafèr ! El la-mèm pa kite Ari rouvèr son boush, la-mèm pa done ali lœ temps tire dann son posh son bèlzamine en shèrpi :
« Il est en retard, virgule. Il arrive suant et tout crotté en classe : au coin, point final ».
Dépi uit hër-édmi ziska onz hër-in-kar, Ari la-rœmashe son maléré sor dan lœ koin son klasse ; li la-remine son malèr ; li la-kriye — boush férmé soman — son kolèr ; li la-fé la promèsse pi li pou sèrve kouyon in métrèsse lékol.

Axel Gauvin