Zordi gran dézorde kouto-foursète konm dabitide. Kan-mèm gran dézorde kouto-foursète-là, kan-mèm zot boush lé plin, ça i défande pa zot kasse la blag.

Zordi prinsipal baz konvérsassion : zistoir déssér. Koman déssèr, kiça déssèr, akoz déssèr ?
Mi passe par lo plus kourte :
Zilbér-Tonbe-Kriz : Di mérsi Jilber , mérsi manman Jilbér. Par zot deux mèm manjé l’arvnu. Grace zot deux mèm néna déssèr jordu.
Rémon : Kèèèl ! Mèrsi ? Akoz mèrsi ? Mwin la-fine dire azot : zéléksion i arvien. Po ça mèm nou néna bon manjé, néna déssèr, néna toute… In boug futé lo maire-là ! Zot va oir si lu ar-rante pa !
Mano : (margonhyaz i tienbo pa d’boute).

Ala toute kalité la kouyonade lézot i rakonte. Amwin, mon lidé lé sanm Lina, pou Lina, par Lina. Lo rèst’ i konsèrne pa amwin, mi rantr’ pa ladan ! Zordi – akoz plus for zordi ? – son shové rouz i kriye amwin, i rale amwin, i anbale amwin. I dévlope mon lamour. Té mon gardien volkan, ton shové mèm la sourse defé, karo la flanm. Mi vé li bril mon deux min. Mi vé li konsome mon kèr. Ton shové : zérbe-roz kank bardzour i parète ; kanne anfléri dann solèy koushan. Nou va kassiète dann ton shové tou-lédeux, na roule ladan, na bingne ladan, na i yème inn-é-l’ot ladan mèm.

Axel Gauvin