Soman, Granmèr ossi lé là : èl la-poze son déyèr dessi in pti tabouré bordaz bassin. El i fé bingne (1) son pié dann pensée-d’eau. Lina i rale amwin à mort, soman pa moiyin alé zoinn’ aèl : Granmèr !
Lé tro sir la vièy i koné mwin lé amaré tèrla-là dessi lo bor : èl mèm lotèr ! Ça i défande pa aèl pète à rire. El i rire, èl i fini pi d’ rire. El néna tor soman, parsk, aforstan èl i rire, son gougnardaz i shabouke amwin : mi pran in kér, mi sava arzoinde Lina.

Granmèr i léve. Dabor inn, èl i saboule anou sanm zirman, ménasse, malédiksion. Apréça, toute çak èl i trouve atér, èl i anvôye dessi nou : pensée-d’eau fine sèk, lo bransh pouri, gazon la bou. Toute bann mon famiy i rante dann ron, lo vié dann tas ! Toute i zire, i ménasse, i saboule anou.

Mi dévire mèm pi la tête en arièr, mi avanse, mi avanse mèm. Mi arive sanm Lina. Nou lé si tèlman san passianse yème inn-é-l’ot, nou (i) tonbe tou lé deux séré ansanm à la ranvérse dann bassin. N’i anprofite pou anbrassé, anbrassé, lontan, lontan, lontan : ziskatan k’ nou (i) pérde réspirassion, nou lé oblizé arlévé…

Astér, bann’a i anvôye galé dessi nou. I shaboule anou coup-d’galé. Pou nou anpare ça, n’i kost’ tant n’i gaingne dessi lo kape. I vize anou. I vize anou mèm. Firmezir, lo rosh i batte plus près, tro près.… Na inn i toushe Lina.
Lina i singne (2), i singne. El lé bingné dann son sang. Mi lève aèl konm mi vienbou, mi porte aèl dessi lo bor.

Lo rosh i arète gréné.
Lo bra papa i shape atér. Granmér, lo kër i fémal, èl i vien konm fol. El i ponje lo sang Lina, i anbrasse son deux min, son deux pié…

Axel Gauvin

(1) bègne.
(2) sègne.