La plui i tonbe mèm. Mwin lé trist’. Pa akoz la plui, bien sir : la plui-là i rale la tristèsse rienk dann kèr demoun dé-sértin péi déor ke somanké na dleau lé mové…
Mwin lé pa rienk trist’, mwin lé trakassé : Lina lé pa là.
Kan-mèm mwin lé tro sir Lina na rienk in bon robe mèm, kan-mèm (1) mi koné dann temps la plui konm ça-là, lo linz lé malizé (2) pou séshé, kan-mèm mi sipoze son momon la-fé rèst’ aèl la kaz pou èl avèye dessi son bann ti-frèr-ti-sër, kan-mèm Ari ossi lé pa là, kan-mèm… toute ! traka i manze mon jër.
Anplus, mwin lavé tèlman, si tèlman bezoin d’èl. Sirtou apré lo rèvman mwin la-rève dan la nuite – bon rèv pou komansé, pou fini en koshmar :

Lina lé deboute dann Bassin Kormoran. El lé pa en mayo, lé pa touni, na son linz dessi èl konm dabitide. El i dboute dann zétinsèl de-leau la kaskade, dann zétinsèl solèy. Bann zékli – zékli de-leau, zékli solèy, zékli lo deux marié ansanm – i shanze en pti pérl kank zot i toushe lo ranpar rosh volkan. Lo pti pérl i komanse déssande, i roule dousman, i frole in pié kapilèr fishé dan la lav… Alala li gaingne lélan, li filoshe, li déboule en dsandan… Li déboule pou li kale in coup sèk, apréça li prann in coup lo temps roule, en réspé, dessi gran fèy sonz-là… Boudikonte, li largue lo ranpar, li vien koule dessi Lina, li vien karèsse shové Lina, karèsse son barkolé, son zépol, son dos… Goutte par goutte, de-leau-là i éfasse lo linz en mousline pou li libère lo corps Lina.
Lina i rire. I rire sanm mwin. El i grin-d’grénade-mir sanm mwin. Son corps, son rir, i rale amwin…

Axel Gauvin

(1) malgré.
(2) difissil.