“Titone” ! Ala komank bann’a i apèl çak mi apèle “Guèl-Roz”. Si in tone i pèze cent kilo, lœ nom "Titone" i colle bien dessi Titone. D’ot nom ankor noré bien collé ossi. Narpi done ali lœ nom "Ti-Barik" ossi, lœ nom "Gro sosso", lœ nom "Bèlbèl", lœ nom "Manzé papa", sans compté lœ nom "Mislin", épila d’ot ankor…
Titone lé pa marmaïy i manze lœ rosh son kaz lœ soir. Bann Titone-là i passe pa la mizér, ça. Son papa néna kamion ziska. Li sarôy son kanne èk kanne lézot ansanm. Ça po di aou si li gaingne son pourkoi !! Lé pa manzé i manke Titone, en kontrèr ! Mé-soman son boush na poin lœ frin, son ventr’ na poin lœ fon. Li gaingne pa sanpasse anvalé en longuèr d’ zourné.

Malgré toute lœ vilin manièr lœ boug, malgré lœ wati-watia li la-kraze dessi mon konte, mi anvé pa d’ li. Mi panshe mon kor dessi lœ bèl mür la fénète – kan-mèm i brosse mon ventr’, rien ! – épila mi alonze lœ zassiète ziska lœ pti min kourte lœ Titone, in pti min lœ doigt lé bouré parèy sossise lé pou bouyi.
Lœ depain-sardine Mano i tienbo pa lontan devan lœ dent Titone. Rèzman Lina i aporte – kado bann fiy – d’ot manzé pou li. Mwin la-pokor fé passe ça, Lina i prévien amwin ti-louète :
– Tansion !
Ivone ! Si Lina té pa là pou avèye la porte pou mwin, mon pois té au feu.
Bien sir Ivone l’apérsi ke n’i sorte en vitesse koté la fénète. Ou va dmandé si èl i sava oir koça i éspasse par dann fon ! Èl éssèye panshe son gro kadav pou ’gardé. Soman, la fénète lé si tèlman haut, lœ fon lé si tèlman okré, épila sirman Titone la-kost’ bien son corps koté soubassman, Ivone, malgré lœ débordaz la gresse pov Titone-là, i voi zéro-kalbasse-la-fümé…

Axel Gauvin