Pa-sito nou i rantr’ dann réféktoir, Guèl-Roz, dann karo kanne par dann fon lœ vié fénète, i signale anou. N’i dégaze pou vni voir ali. Ça i fé plézir lœ boug po toulbon : li mètte son gran domino à lér, son dent, si zot i préfère ! Domino mov ! Son lang ossi lé mov. La boush ossi. Toute lé mov ! Sépa ouça li la-tire zanblon kontr’-sézon-là !
Guèl-Roz i rire, mé soman, parlfète, li gaingne pi anparé :
– Mwin na faim ! Békali k’ mwin na faim !
Ièr matin, Guèl-Roz la-di vié Sumard, son gramoun, li part pa lékol, li arète la kaz. Koça son gramoun la-kroire ? Çak toute gramoun noré kroire : son garson, son pti shéri, son pti gaté – lœ gro kittsamèr ! – i vé shape sanm lékol ! Gramoun Sumard la-trape in piosh sanm in gran kouto, la-mètte lœ gran kouto dan la min son “paresse”, la-oblize ça koupe kanne – kanne la gratèl, kanne fourmi gran dent ! Apréla la-oblije ali grate karo zariko – ziskatank gro fénoir la-rantré !
Zordi, bardzour mèm pokor parète, gramoun Sumard i fé lève son parèsse, son “finhyan”, son gratër-d’ki :
– Lève aou ! Na in mti karo kanne i atann aou, là !
– Hin hin : mi part lékol zordi, mwin !
– Ou i part lékol, alorse !

Kèl “part lékol” ! Kashiète dann kanne, oui ! Epila, depi gran-matin, rode in nafèr pou manzé.
Rodé ! Rodé ! Rodé !
Guèl-Roz la-trouve rienk kanne pou li anbète la boush ansanm – kanne en kantité, kanne en piyaz, kanne en délüz, kanne tanksétassé pou vréman. Soman aforse aforse, kanne dessi kanne, lœ ventr’ i vien dou : lœ boug lé ragoulé. Li la-trouve ossi zanblon – détroi kaniki zanblon-la-mizèr ! Rienk çak i fo pou move son dent, son lang, son boush.
Astér, ala li là, anba par dann fon la fénète. Son ventr’ lé po kriye tire. Li plère prèsk :
– Mwin na faim !
Mano i mètte 2 sardine sanm détroi boute depain dessi in zassiète. Li vé kado ça Guèl-Roz, soman son bra lé tro kourte. Li dmande amwin :
– Oté soubaya, done ça in kou Titone, va !

Axel Gauvin