Zordi deuxrézon pou mwin békabir (1).
Dabor inn : létshi pou déssèr ! Létshi roz en feu, létshi-zapèl mouçamièl – lo sanbon oté, lo sanbon, létshi-là ! – létshi en siro, létshi la pérde lo grin !
Létshi !
Kiça noré mazine in nafèr konm ça-là dan nout kantine !

Epila : Ari !
Inn fois navé in déssèr konm ça-là, mwin té i kroire li noré rantr’ ladan konmsik li lavé pa gaingne manzé depi zourdlan. Mwin té i kalkil mwin narté oblizé passe mon temps sèrre son laryaz :
– Manze pa tro vite, oté ! Ton part létshi-là, kiça va toushe ça ! Epila, guète laba, Lina pou vèye atoué !…
Parlfète in préshman la moral, in préshman i fatig lo préshèr mèm en promié. Soman, olèrk ça, lo Ari sé-d’ trape en réspé inn son bann létshi-là. Dousman dousman, léjèr léjér, li komanse ékale toute bann ti pikpik rouz dessi la peau. Li fé in mti zéf ansanm, in mti zèf la kok blan parèy de-lait, soman in de-lait i tarde pa pou rouyé.
– Guète ça, Baya ! Guète ça ! Mwin la-niabou ! Mwin la-niabou !
Li cé-d’ pète à rire !
Dézièm létshi, dézièm ti zéf, dézièm pétaz la joi !

Tilanpe, tilanpe, en réspé, en passianse, en konsianse, Ari i fabrike in nid garni d’ zéf ti poul Zapon (k’i vire vittman soman en zéf ti kaïy de Shine). Zilbèr la-fine manze toute la siène dopi lontan, Titone lé pou fé dor lo pti toupi li la-fé sanm lo grin son dérnié, kank Ari i goute – konm en rogré – son promié !
Ari, aou ankor in ot, aou, Ari-là !

Axel Gauvin

(1) Trouve drol, bizar.