Titone, pou li romérsié anou pou lo manzé k’i done ali – lo ti-trépeu d’manzé : plüs i gaingne pa – Titone i kado anou in papa kamaléon. In sapèr bèl zamal kamaléon, rouz sanm la kolér, èk in gran trafilade zépine i dboute en barikade depi devan son tête, ziska son boute la keu. Rémon i tienbo bébète-là, dessi dalaj la kantine, sanm in gran gatir, kaziman parèy bann blan i promène zot shien.
Apark Adèl sanm Zilbèr – 2 kokol la për kamaléon – nout toute lé tro kontan ! Lo rir i füze. Kozman i grène. Ari i vé fé füme lo bébète, toulmoun lé dakor, soman pérsone na poin – kansréti in koukoune. Romark : in grin zalimète ossi na poin ! Mano i fé in déklarassion konm dekoi i fo mètte lo zamal dann tiroir la diréktrisse, dessou son sérvièt-de-tab.
Gro-Ivone i débarke : nou na zist lo temps zète déor lo kamaléon avan k’i trape anou.

Manmzèl i ardone in lesson d’ manzé, soman son kër la-fine afayi. Akoz èl i konpran pa i gaingne pa tire de-leau dann rosh ? Koça i ienbou fé sanm sovaz konm anou-là ? Odrémié – mi di ça pou èl mèm – èl i kite anou pou la valèr !
Daoir èl i kontinié pou son plüs méyèr zélèv : Ivone. Plüs méyër, na poin : ça i tète son lang kank li dékoupe son viande, ça i éssuiye sanm la mie d’pain son lèvr ke la sosse kari la-gomé ! Rienk la lèvr èl i éssuiye, don ! La robe ossi kank lo luil la-koule dessi. Epila, robe sinon lèvr, lo pti morso la mie d’pain, èl i poze ça dan lo koin son pla. En rogré soman... en dépitassion. Tazantan romor i monte si èl : èl i artrape pti boul de-pain-là, ouhop, dann gouf son gran guèl gran rouvér.
Lina la pi rienk inn pou èl moké astèr : na 2 ! E èl i kite pa lo mokaz pou tantine Luiz ! El i lève ti doigt en pionte : ala pou inn (manmzèl-diréktrisse). El i karte en massikrok sink bèl zandouiy kosson-péi : ala pou l’ot (Ivone-gro-taba).

"Bon Dieu Ségnër la viérj Marie", konm di Rémon, provik lanbaratèz-diréktrisse sanm son nérvi i trape pa Lina !

Axel Gauvin