– Manje, té Baya !
Depi mon tangaz sanm Ivone, Rémon i kriye pi mwin otreman k’ par mon pti nom gaté. Mwin la pa sûr pourtan marmaïye-là i yème amwin.
– Manje, té Baya !
Afèr manzé ankor : mi manze pa. Afèr réponde : mi réponde pa.
– Manje aou, té !… Manje p’aou, manje manjé ! Mèm si zot manzé lé déguélasse, di p’amwin sanm inn bone gob piman, lu dsande pa !

Sépa kèl idé i pran Rémon toudinkou : li cé pa d’ komanse gougnarde amwin :
– Lapéti Baya lé pa bone ! Baya la-vnu boukar ! Daoir Baya na le vèr ! Di manman fé boui keur d’ pèch po Baya !
– Aou ! Alé vande la-sann déyèr Gran-bazar ! Epi, larg in kou mon monmon. In !

Mi anvé pa d’ li, mwin, Rémon. Soman maïye pa monmon dan son gougnardaz. Mi anvé pa d’ li : li koné pa èl lé mor l’otr’ané. Bien sûr li farse sinpleman. Mé-soman, toute fasson, i fo li kasse son kozman insinifian : mwin lé pa anvi ditou anpare sa.
– Larg in kou mon monmon ! San koi…
Rémon i rakokiye devan son pla : li fé grolèv boudin. Mwin lé ziska kontan. Mi mazine ce pti romanse Granmèr té i agasse amwin ansanm :

Si ou lé en kolèr
Kole anlèr
Kank la plüi va tonbé
Ou va dékolé…

Depi ièr Lina i fé la fanm sanm son shové lash. Soman son kèr la-vni en galé : èl i zète mèm pi in zié, tazantan, dessi son frér.

Axel Gauvin