La sër Ari i arète pa vire son zié nout koté. Rémon i di : ça pou sirvèye son frèr, apréça èl va fèr son makrotaz (Rémon i di makrotaj), èl va fèr son makrotaz sanm son manman pou son frér. Ari i arvire : zamé sa sër va fèr lang torte pou li, sa sër i yème ali.
Rémon i perde pa lokazion pou li di anou konmça èl i largue pa son frèr dann shemin kan zot 2 i part lékol ; mèm shoz kank zot i artourne la kaz lœ soir. Li gougnarde Ari :
– In gran koulou konm vou-là, i vienbou mèm pa marche tou-seul dann chemin !
– Mi vienbou pa ! Mi vienbou pa ! Mi vienbou, mwin !
– Saspeu ou i vienbou, soman, kank èl lé là, ou i pandiye sanm sa robe ! Iérossoir, hin, kank nou la-voulu souk kamaléon au lacs, ou narté kontan vnir sanm nou. Ou narté kontan ? Hin ? Akoz ou la-pa vnu ? Akoz ?
– Akoz Lina...
– Akoz Lina ! Akoz Lina ! Bin justerézon ! Koça mi dizé !

Ari i vien rouz parèy piman mir. Daoir son 2 zou i brile parèy piman mèm !… Rèzman Ari lé pa pou armasse lontan son mové pensée :
– Zot la-fé fume alu ?
– Kiça ?
– Kamaléon-là !
– Ou va dmandé !
– La-gonflé, lu ?
– Parèy la blade kochon !
Ari i rouvèr gran rouvèr son zié, gran konm marmite douz poin :
– Lœ ventr’ la-pété ?
– En fleur !
Kank li antan ça, Ari i bave. Kontanteman i fé bave Ari ; kontanteman, lanvi, lœ rœgré. Inn déyèr l’ot. Son bav i sourse dan lœ koin son lèvr, i file, i dégoute. Lœ dégou i vien tonbe dan son zassiète... Si Lina i voi ça !

Ala pa k’ mi vien d’ apèle aèl Lina ! Ala pa k’ mi souète èl i gaingne pa la onte sanm Ari ! Ala pa k’ mi lève lœ zié dessi èl, épila nout rœgar i toushe inn-é-lot, épila èl i dévire la tête en vitèsse, épila èl i vien rouz, plus rouz k’in piman mir, plus rouz ke son shœvé, si tèlman rouz, son kodêne i fonde dan lœ rouz son figüir...
Soubaya, vié fra ! Ou lé pou rakonte zistoir TiZan-Gran-diab, là ! Komank ou i koné èl la-rouzi : ou la-dévire la tête, ou la-bèsse lœ zié, plus vite ke èl ankor ! Somanké èl la pa ditou anvi d’ kroize son zié sanm çate in garson, in garson noir anplüs, malbar pou ashève lœ tablo !

Axel Gauvin