Bayalina, par Axel Gauvin… in roman dann la lang kréol rényoné, an fèyton dann Témoignages -42-

Merkredi 3 oktob, dézièm morso

6 avril, sanm Axel Gauvin

Zordi, parèy toute mardi : sardine en boite ! Sanm de-bèr anplüs ! Lé dosse ! Nout toute i manze son manzé. La diréktrisse lé kontan. Bien sûr lapéti lé inpé tro bone, rien : èl i sourire. Daoir él i mazine :
« Ils vont apprendre, ti-lanpe-ti-lanpe, à faire semblant de faire le boukar devant le manger tout en le dégustant. »
Kroire ça, ou, Manmzèl ! Touléka, Soubaya i souète aou bone shanse sanm bann Mano, Ari, Guèl-Roz é konsor.

Astér, Manmzèl i fé in coup la ronde rantr’ lœ bann tab. El i retoushe la fasson inn i tienbo son foursète, èl i dœmande l’ot mètte inpé laryiaz dessi son lapéti, apréça, fier konm Rataplan, èl i sorte en kraze-pa-dezèf-molé.
Pa-sito èl la-fine vire son dos, la kantine i rœfé konmkifo : gran dézorde pou komansé, délüj kouto-foursète, gran louète, gran krié, épila i blade, i boure, i goulafe, i goulipiate. Plus for k’toultan.

Mi dévire doussman la tête pou mwin guète in tour Lina : alapak èl lé pou arkomanse la lesson d’ manzé ! Alapak èl lé pou moke la diréktrisse ! El ossi, èl i trouve son pti poz, son moulir ; èl ossi i fé son dantèl, èl ossi i fé son boush en fonnman volaye, èl ossi i fé son deleau sikré. I tourne pa kourpion, soman lé konmsi : ti doigt au sièl, èl i taptape dessi son lèv sanm in mti morso la mie d’pain, apréça, la mie-là, èl cé-d’… anvôye ça anlèr pou kape ça sanm son boush gran rouvèr ! I floute, i tonbe atèr ! Rien ! Pa ça pou rann aèl kami. En kontrèr : cé-d’ pète à rire.
Lo rir Lina ! Kaskade lœ rir Lina ! Epi son dent, son dent blan ! Ça i éklate dann fon kantine-là !

Granmèr ossi na zoli dent. Kan-mèm èl lé fine vié, la point inn son dent-là la-fine shape dann son bouss. Tou lé zour ossi, tou lé gran matin, èl i brosse ça lontan, lontan, sanm sarbon k’èl la kraze ékspré fin, fin mèm. Apréça, èl i rinse son boush 3 leau : la glasse lé paré. Pingne aou devan si ou i vé !
Lina, sirman, i brosse pa son dent sanm sarbon ! Saspé sanm kër d’ pèsh ? Koman k’ son boush-là, daoir, i sent bon, sanm son lodër d’ kër pèsh !

Axel Gauvin

Padport

Signaler un contenu

Inn modékri, inn ti lavi, inn komantèr ?