Manmzèl Diréktrisse – Rémon i di èl lé rienk manmzèl, inn fois na poin lalianse dann doigt – Manmzèl Diréktrisse i désside fé in démonstrassion d’ manzé pou nou : anou koshon, véra, trui, kadine, tioutiou ; anou k’i koné rienk anfourné, anvôyé, anvalé, bladé, boure nout kanar ; anou souyon, makote, malprope ; argarde inpé komank Demoun i manze !
Ivone la-mètte in zassiète-kouto-foursète dessi biro. Manmzèl i assize déyér, épi anou, n’i fé in ron otour. Pito n’i fé 2 demi-ron : inn lœ fiy koté droite, l’ot garson koté gosh. Rante lœ 2 demi-ron-là in bon balizaz : ti fiy i mélanze pa èk ti garson….
Guèl-Roz i anpofite nou lé séré parèy zaran dan la kèsse pou li ral dessi shové Mano. Lœ Mano i dévir la tête, i langrêne – rante son kro pointi – la manman lœ “kittsamèr” d’ Guèl-Roz. Rèzman la diréktrisse la pa vi, la pa antandi rien.
– La fourchette se tient comme ça, i di. Lœ couteau comme ceci…

Ce lamontraz i fatigue nout toute – çak i manze sal, çak i manze prope. Rienk si i fatigue ! Lé konm si èl té pou zire anou. Bien sir, malgré son fitézon, son lintélizanse, son kapassité, èl i konpran pa ça. El lé rienk an-kér sanm son zoli manièr. El i mètte son poz, son moulir. El i fé son pionte, son dantèl. Èl i manze, soman konm en boukar, akoz, “à table", in moun k’i koné vivr, i fo li fé sanblan li na pa faim, i fo li tourne-vire la boush avan d’ manzé.
– Ma serviette, Yvone ! Vous l’avez oubliée ? Demain sans faute, hein ? Et puisqu’au fond de toute mal il y a un bien, je vais vous montrer à vous débrouiller sans.
Là, pti doigt anlér, sanm in boute la mie d’pain, èl i ponje son lèvr soidizan la sosse la-gomé. N’i gaingne pa sanpasse rire, en missouk soman, akoz si i trape anou pti-frèr ! Nout pois lé au fé !
Son sérviète en pain, èl i manze mèm pa : èl i poze ça dann in koin son zassiète ! Alorse, pou ète zoli maniér, i fo tonbe dan lœ gaspi, koméla !
– A vos places maintenant ! Et mangez ! Et comme il faut, s’il vous plaît !
N’i artourne nout plasse. Epi pou bien amonte aèl ke nou la-bien konpri son prédikassion, mèm pa in minite, nou la-fine anvale toute son pain…

Axel Gauvin