Rienk dan ce kantine-là mèm, mi gaingne oir Lina. Deux golète distanse ankor ! Anplüs rantr’ la tête Ari i anbare la vue in koté, épi la figuir blème, koulèr la fièv, Zilbér-Tonbe-Kriz l’ot koté.
Promié débü, mwin té i oze pa tro rogarde aèl, pangar i goug’narde anou. Koméla, mi kasse pi la tête : mi vèye aèl mèm. Pa pou gaingne mon kontan soman, mé srèss katr-sink fois dan lo temps lo manzé. Débrouye si lézot i kasse dessik dessi mon compte… provite zot i espère kan mon dos lé viré. E ziska zordi, néna poin inn la-trouve toupé pou largue amwin en-face lo plüs guiguine pti foutan ! Davoir zot na la krintiv de mwin !… Davoir samèm ! Davoir zot i craint…
Défoi, nout deux Lina n’i lève la tête ansanm. Nout zié i toushe inn é l’ot… mon sang i kaïye, mon sang i bouiye, néna galfin [1] i lève dann mon zié, mon boush i rir tou-sël. Dan mon kèr, mi di mwin la-gaingne in sipléman, in plüs. Mon plüs-là mi apèle ça "tidosse [2]". Bann "tidosse" Lina i gadianme amwin tèlman !
Apré son partanse, mi compte mon bann "tidosse", mi arcompte ça. Souvandéfoi, troi. Tazantan, deux. Lé rar inn mèm. Kan-mèm lo zour mi gaingne pa plüs, ce sinpleman inn-là i kontante amwin à-n’pa-dire ! Deux “tidosse” i lève amwin, i porte amwin. 3, i tatangue [3] amwin dann bra Bondié !

Lindi 5 novanm

Mwin l’artrouve Lina ! Kontanteman i roule bor-en-bor dann mon kër !
Sink “tidosse” en plüs pou ashève mon rèv !

Axel Gauvin