Lina dan mon zié, Lina dan mon tète, Lina dan mon kèr, Lina dann plus kreu mon l’ame. Lina, Lina partou, partou !
Soman demin : vakanse !…

Alapak mazine vakanse – sinpleman lo mo d’dire vakanse – i fémal mon kèr ! E kroire pa mi yème lékol, oui ! Pou mwin lékol : la-zol ! Poulo-kondor l’Indossine… Soman, alapak in marmaïy konm amwin ke lé oblizé, lékol, toultan lire en kassiète pou mwin tié mon temps – alapak vakanse i fatigue amwin ! Sra ti vakanse kourte, mé rien : 4 zour san oir Lina ! 4 zour va amize pou finir, 4 zour sar longue konm 4 zour san manzé !

Déza, kank néna lékol, mi woi aèl rienk dan lo pti demi-hër d’temps la kantine-là !
Lo matin : mi woi pa aèl. Kank – solèy pokor lévé – mwin la-fine tire delé la shèv, kank mwin la-fine porte ça pou vié Manoul (èl i boire in gran verre avan son pti messe toulézour), l’hèr mi arive lékol, bann fiy – bann garson ossi – la-fine rantré depi lontan.
Lo soir, i largue anou – anou garson – inn demi-hèr d’tan apré bann fiy. Akoz ? Ziska Rémon la poin réponse pou done là-dsi ! Touléka, bann fiy la-fine trassé, fine arive loin, kank i lashe anou nout tour. Lina ossi ! Poitan èl i part arpa zamé san son frér. Mé soman la métresse bann "fin-d’étide-atardé" lé tro préssé d’oir srèss inn dan son bann "grands dadais" konm èl i di, sorte devan èl. Ari i dor si la tab laprémidi ? Tanmié : èl i kite dormi. Epila, kank katr’hèr la pa loin soné, èl i fé dévide in gran gamok delo dessi son tête pou fé lève ali. Lézot la-pokor fine rir, èl la-fine anvôy mon bononm déor, kabaïy en mare, pou li atann son sër. Katr’hèr i sone, i larg bann fiy, Lina i sorte, èl i rale Ari en vitèsse en montan pou èl vite alé ède son manman.

Axel Gauvin